hai jamal-e-husn ka partaw sanam-KHana kahin

hai jamāl-e-husn kā partav sanam-ḳhāna kahīñ

but-kada ka.aba kahīñ hai aur mai-ḳhāna kahīñ

sīdhe raste se bhaTak jaa.e na farzāna kahīñ

aa na jaa.e aql kī bātoñ meñ dīvāna kahīñ

ye bhī koī zindagī meñ zindagī hai ham-nafas

dil kahīñ hai ham kahīñ haiñ aur jānāna kahīñ

tābish-e-barq-e-sitam se yā ilāhī jal na jaa.e

andalīb-e-zār kā gulshan meñ kāshāna kahīñ

phir na dohrā.e kahīñ tārīḳh anjām-e-sitam

ho na jaa.e sabr kā labrez paimāna kahīñ

un ke dāman se lipaT hī jā.egī bas ḳhāk-e-dil

zid pe aa jaa.e na apnā josh-e-rindāna kahīñ

kaisī ujḌī hai ye mahfil 'aish' hangām-e-sahar

sham-e-kushta hai kahīñ aur ḳhāk-e-parvāna kahīñ

hai jamal-e-husn ka partaw sanam-KHana kahin

but-kada kaba kahin hai aur mai-KHana kahin

sidhe raste se bhaTak jae na farzana kahin

aa na jae aql ki baaton mein diwana kahin

ye bhi koi zindagi mein zindagi hai ham-nafas

dil kahin hai hum kahin hain aur jaanana kahin

tabish-e-barq-e-sitam se ya ilahi jal na jae

andalib-e-zar ka gulshan mein kashana kahin

phir na dohrae kahin tariKH anjam-e-sitam

ho na jae sabr ka labrez paimana kahin

un ke daman se lipaT hi jaegi bas KHak-e-dil

zid pe aa jae na apna josh-e-rindana kahin

kaisi ujDi hai ye mahfil 'aish' hangam-e-sahar

sham-e-kushta hai kahin aur KHak-e-parwana kahin