hai jis mein qufl-e-KHana-e-KHummar toDiye

hai jis meñ qufl-e-ḳhāna-e-ḳhummār toḌiye

ya.anī dar-e-bahisht ko yakbār toḌiye

kyuuñ qaid-e-ḳhum meñ duḳhtar-e-raz hī paḌī rahe

ye mohr-e-resmān-e-sarokār toḌiye

shāgird amīr-hamza-e-sāhib-qirāñ ke haiñ

kyūñkar bhalā na qil.a-e-ashrār toḌiye

kiije laqā-e-bāḳhtar-e-be-baqā ko qaid

najtak ke sar pe gurz-e-garāñ-bār toḌiye

choTī pakaḌ ke nargis-e-jādū kī khīñchiye

kalle ko us ke māriye lalkār toḌiye

rustam se chhīn lījiye dev-e-safed ko

aur is kī dah maroḌ ke talvār toḌiye

sadd-e-sikandarī bhī jo chaḌh jaa.e dhyān to

vohīñ tufail-e-haidar-e-karrār toḌiye

aa jāveñ haft-ḳhvān-e-tilismāt sāmne

to ḳhair se unheñ bhī ba-takrār toḌiye

hisn-e-zamurradain-e-adū koh-e-qāf par

hove to us ko bhej ke ayyār toḌiye

zambīl hai amar kī dil-e-fikr-ḳhez ye

is ko kisī tarah se na zinhār toḌiye

hai azm-jazm ye ki zabardastī aaj to

band-e-qabā hai mausam-e-gulzār toḌiye

yā chheḌne ko abr ke ik jhaTkā maar kar

shalvār-band barq-e-sharar-bār toḌiye

jī chāhtā hai le ke balā.eñ tumhārī aaj

poreñ in uñgliyoñ ko sab ai yaar toḌiye

'inshā' dikhā ke aur bhī ik jalva-e-ġhazal

band-e-naqāb-e-shāhid-e-asrār toḌiye

hai jis mein qufl-e-KHana-e-KHummar toDiye

yani dar-e-bahisht ko yakbar toDiye

kyun qaid-e-KHum mein duKHtar-e-raz hi paDi rahe

ye mohr-e-resman-e-sarokar toDiye

shagird amir-hamza-e-sahib-qiran ke hain

kyunkar bhala na qila-e-ashrar toDiye

kije laqa-e-baKHtar-e-be-baqa ko qaid

najtak ke sar pe gurz-e-garan-bar toDiye

choTi pakaD ke nargis-e-jadu ki khinchiye

kalle ko us ke mariye lalkar toDiye

rustam se chhin lijiye dew-e-safed ko

aur is ki dah maroD ke talwar toDiye

sadd-e-sikandari bhi jo chaDh jae dhyan to

wohin tufail-e-haidar-e-karrar toDiye

aa jawen haft-KHwan-e-tilismat samne

to KHair se unhen bhi ba-takrar toDiye

hisn-e-zamurradain-e-adu koh-e-qaf par

howe to us ko bhej ke ayyar toDiye

zambil hai amar ki dil-e-fikr-KHez ye

is ko kisi tarah se na zinhaar toDiye

hai azm-jazm ye ki zabardasti aaj to

band-e-qaba hai mausam-e-gulzar toDiye

ya chheDne ko abr ke ek jhaTka mar kar

shalwar-band barq-e-sharar-bar toDiye

ji chahta hai le ke balaen tumhaari aaj

poren in ungliyon ko sab ai yar toDiye

'insha' dikha ke aur bhi ek jalwa-e-ghazal

band-e-naqab-e-shahid-e-asrar toDiye