hai jumbish-e-mizhgan mein teri tir ki aawaz

hai jumbish-e-mizhgāñ meñ tirī tiir kī āvāz

is tiir meñ hai said kī takbīr kī āvāz

mushtāq huuñ tujh lab kī fasāhat kā va-lekin

'rāñjhā' ke nasīboñ meñ kahāñ hiir kī āvāz

tū ḳhusrav-e-ḳhūbāñ hai ki le hind siiñ tā rome

pahuñchī hai tire husn-e-jahāñgīr kī āvāz

hairat ke maqāmāt meñ qānūn-e-navā na.iiñ

hai sāz-e-ḳhamoshī lab-e-tasvīr kī āvāz

dīvāne kuuñ mat shor-e-junūñ yaad dilāo

hargiz na sunāo use zanjīr kī āvāz

piitā huuñ judā.ī meñ tirī ghūñT lahū kī

sun ġhuncha-dahan āshiq-e-dil-gīr kī āvāz

ai jān-e-'sirāj' aa ke patañgoñ kī ḳhabar liyo

sun jaao mire nāla-e-shab-gīr kī āvāz

hai jumbish-e-mizhgan mein teri tir ki aawaz

is tir mein hai said ki takbir ki aawaz

mushtaq hun tujh lab ki fasahat ka wa-lekin

'ranjha' ke nasibon mein kahan hir ki aawaz

tu KHusraw-e-KHuban hai ki le hind sin ta rome

pahunchi hai tere husn-e-jahangir ki aawaz

hairat ke maqamat mein qanun-e-nawa nain

hai saz-e-KHamoshi lab-e-taswir ki aawaz

diwane kun mat shor-e-junun yaad dilao

hargiz na sunao use zanjir ki aawaz

pita hun judai mein teri ghunT lahu ki

sun ghuncha-dahan aashiq-e-dil-gir ki aawaz

ai jaan-e-'siraj' aa ke patangon ki KHabar liyo

sun jao mere nala-e-shab-gir ki aawaz