hai KHak-basar saba mere baad

hai ḳhāk-basar sabā mire ba.ad

gulshan kī phir havā mire ba.ad

thī jā-e-visāl manzil-e-gor

hāsil huā mudda.ā mire ba.ad

ai tap na jalānā ustuḳhāñ ko

māyūs na ho humā mire ba.ad

qātil ne bahā.e laash par ashk

thā bas yahī ḳhūñ-bahā mire ba.ad

yuuñ ḳhaak meñ maiñ milā ki us ne

paayā na mirā patā mire ba.ad

kī daaġh ne ḳhaak se tarāvish

gul qabr se ye khilā mire ba.ad

auroñ pe karoge jab jafā.eñ

yaad aa.egī ye vafā mire ba.ad

go maiñ na rahā magas kī sūrat

shohra to rahā mirā mire ba.ad

ai ġham mirī jaan khā chukā tū

kyā hogī terī ġhizā mire ba.ad

be-jurm kiyā jo qatl mujh ko

jallād ḳhajil huā mire ba.ad

rūThā rahā yuuñ to umr bhar vo

turbat se gale lagā mire ba.ad

baaqī na rahā jahāñ meñ 'ājiz'

kuchh lutf zabān kā mire ba.ad

hai KHak-basar saba mere baad

gulshan ki phir hawa mere baad

thi ja-e-visal manzil-e-gor

hasil hua muddaa mere baad

ai tap na jalana ustuKHan ko

mayus na ho huma mere baad

qatil ne bahae lash par ashk

tha bas yahi KHun-baha mere baad

yun KHak mein main mila ki us ne

paya na mera pata mere baad

ki dagh ne KHak se tarawish

gul qabr se ye khila mere baad

auron pe karoge jab jafaen

yaad aaegi ye wafa mere baad

go main na raha magas ki surat

shohra to raha mera mere baad

ai gham meri jaan kha chuka tu

kya hogi teri ghiza mere baad

be-jurm kiya jo qatl mujh ko

jallad KHajil hua mere baad

ruTha raha yun to umr bhar wo

turbat se gale laga mere baad

baqi na raha jahan mein 'ajiz'

kuchh lutf zaban ka mere baad