hai KHamosh aansuon mein bhi nashat-e-kaamrani

hai ḳhamosh āñsuoñ meñ bhī nashāt-e-kāmrānī

koī sun rahā hai shāyad mirī dukh bharī kahānī

yahī thartharāte aañsū yahī nīchī nīchī nazreñ

yahī un kī bhī nishānī yahī apnī bhī nishānī

ye nizām-e-bazm-e-sāqī kahīñ rah sakegā baaqī

ki ḳhushī to chand lamhe ġham o dard jāvedānī

haiñ vajūd-e-shai meñ pinhāñ azal o abad ke rishte

yahāñ kuchh nahīñ do roza koī shai nahīñ hai faanī

tirī baat kyā hai vaa.iz mirā dil vo hai ki jis ne

isī mai-kade meñ aksar mirī baat bhī na maanī

pai-e-raf-e-bad-gumānī maiñ vafā barat rahā thā

mirī pai-ba-pai vafā se baḌhī aur bad-gumānī

mirā mai-kada salāmat ki har ek qaid uThā dī

na to dair kī ġhulāmī na haram kī pāsbānī

karūñ un se laakh shikve magar un se shikva karnā

na tarīqa-e-mohabbat na rivāyat-e-javānī

hai KHamosh aansuon mein bhi nashat-e-kaamrani

koi sun raha hai shayad meri dukh bhari kahani

yahi thartharaate aansu yahi nichi nichi nazren

yahi un ki bhi nishani yahi apni bhi nishani

ye nizam-e-bazm-e-saqi kahin rah sakega baqi

ki KHushi to chand lamhe gham o dard jawedani

hain wajud-e-shai mein pinhan azal o abad ke rishte

yahan kuchh nahin do roza koi shai nahin hai fani

teri baat kya hai waiz mera dil wo hai ki jis ne

isi mai-kade mein aksar meri baat bhi na mani

pai-e-raf-e-bad-gumani main wafa barat raha tha

meri pai-ba-pai wafa se baDhi aur bad-gumani

mera mai-kada salamat ki har ek qaid uTha di

na to dair ki ghulami na haram ki pasbani

karun un se lakh shikwe magar un se shikwa karna

na tariqa-e-mohabbat na riwayat-e-jawani