hai khel jari azal se ye auj-o-pasti ka

hai khel jaarī azal se ye auj-o-pastī kā

uruuj jis kā kabhī thā zavāl hai us kā

banā.ī us ke tasavvur meñ hai na.ī tasvīr

hai shāhkār mirā par ḳhayāl hai us kā

kahā thā us ne na jī pā.egā mujhe kho kar

vo jī rahā hai to ye bhī kamāl hai us kā

ḳhumār us kī mohabbat kā yuuñ vajūd meñ hai

ki aks meñ mire shāmil jamāl hai us kā

javāb de diyā us ne savāl kā mere

magar javāb meñ phir ik savāl hai us kā

kuchh is tarah se vo sheroñ pe daad detā hai

ki goyā zauq-e-suḳhan be-misāl hai us kā

'sabīha' yūsuf-e-sānī to vo nahīñ lekin

mirī nazar meñ samāyā jamāl hai us kā

hai khel jari azal se ye auj-o-pasti ka

uruj jis ka kabhi tha zawal hai us ka

banai us ke tasawwur mein hai nai taswir

hai shahkar mera par KHayal hai us ka

kaha tha us ne na ji paega mujhe kho kar

wo ji raha hai to ye bhi kamal hai us ka

KHumar us ki mohabbat ka yun wajud mein hai

ki aks mein mere shamil jamal hai us ka

jawab de diya us ne sawal ka mere

magar jawab mein phir ek sawal hai us ka

kuchh is tarah se wo sheron pe dad deta hai

ki goya zauq-e-suKHan be-misal hai us ka

'sabiha' yusuf-e-sani to wo nahin lekin

meri nazar mein samaya jamal hai us ka