hai mera tar-e-nafas tar-e-qafas

hai mirā tār-e-nafas tār-e-qafas

rishte barpā hoñ giraftār-e-qafas

murġh-e-dil ko zab.h ai sayyād kar

aur taa.ir haiñ sazāvār-e-qafas

shauq bulbul ko asīrī kā jo ho

ho zar-e-gul se ḳharīdār-e-qafas

kyuuñ na maiñ rañgīñ-bayāñ huuñ qaid-e-rañj

murġh-e-ḳhush-ḳhvāñ hai sazāvār-e-qafas

zindagī se qaid meñ bhī huuñ subuk

gaah bār-e-dām gah bār-e-qafas

mujh sā bulbul qaid ho kar chhūT jaa.e

so ga.e kyā baḳht-e-bedār-e-qafas

chashm-e-ālam meñ asīr-e-dām hai

ruuh hai tan meñ sazāvār-e-qafas

phāñd kar aayā thā dīvār-e-chaman

phāñd jā.ūñ kyuuñ ki dīvār-e-qafas

kyā hai dāġh-e-ḳhūn-e-bulbul kī bahār

dekh ai sayyād gulzār-e-qafas

kab kisī bulbul ko miltā hai gulāb

ḳhūn-e-dil piitā hai bīmār-e-qafas

zab.h karne ko utārā naḳhl se

sar mirā thā pā-e-raftār-e-qafas

pūchhtā hai kyā dil-e-bulbul kā haal

dekh zālim jism-afgār-e-qafas

ashk ko hai dām-e-gesū kī talāsh

tifl hotā hai ḳharīdār-e-qafas

tā-ba-kai hogā asīr-e-dām-e-fikr

'arsh' kar mauqūf ash.ār-e-qafas

hai mera tar-e-nafas tar-e-qafas

rishte barpa hon giraftar-e-qafas

murgh-e-dil ko zabh ai sayyaad kar

aur tair hain sazawar-e-qafas

shauq bulbul ko asiri ka jo ho

ho zar-e-gul se KHaridar-e-qafas

kyun na main rangin-bayan hun qaid-e-ranj

murgh-e-KHush-KHwan hai sazawar-e-qafas

zindagi se qaid mein bhi hun subuk

gah bar-e-dam gah bar-e-qafas

mujh sa bulbul qaid ho kar chhuT jae

so gae kya baKHt-e-bedar-e-qafas

chashm-e-alam mein asir-e-dam hai

ruh hai tan mein sazawar-e-qafas

phand kar aaya tha diwar-e-chaman

phand jaun kyun ki diwar-e-qafas

kya hai dagh-e-KHun-e-bulbul ki bahaar

dekh ai sayyaad gulzar-e-qafas

kab kisi bulbul ko milta hai gulab

KHun-e-dil pita hai bimar-e-qafas

zabh karne ko utara naKHl se

sar mera tha pa-e-raftar-e-qafas

puchhta hai kya dil-e-bulbul ka haal

dekh zalim jism-afgar-e-qafas

ashk ko hai dam-e-gesu ki talash

tifl hota hai KHaridar-e-qafas

ta-ba-kai hoga asir-e-dam-e-fikr

'arsh' kar mauquf ashaar-e-qafas