hai mere pahlu mein aur mujhko nazar aata nahin

hai mire pahlū meñ aur mujh ko nazar aatā nahīñ

is parī kā sehr yaaro kuchh kahā jaatā nahīñ

ashk kī bārish meñ dil se ġham nikal aatā nahīñ

ghar se bāhar meñh barasne meñ koī jaatā nahīñ

chāk-e-jeb apne ko maiñ bhī juuñ garebān-e-sahar

nāsehā tā-dāman-e-mahshar tū silvātā nahīñ

sham.a saañ rishte par ulfat ke lagā dete haiñ sar

āshiq aur ma.ashūq sā bhī dūsrā naatā nahīñ

bas-ki tere hijr meñ hai nā-gavārā akl-o-sharb

dil ba-juz ḳhūn-e-jigar ai jaan kuchh khātā nahīñ

maiñ hī tum sab kā banā tīr-e-malāmat kā nishāñ

us but-e-sarkash ko yaaro koī samjhātā nahīñ

vaa.e ye ġhaflat ki dariyā biich qatre kī tarah

aap hī meñ aap ko DhūñDūñ huuñ aur paatā nahīñ

tark-e-ishq us sarv-e-bālā kā kiyā hai jab se dil

ālam-e-bālā se bālā.ī ḳhabar laatā nahīñ

bas-ki hai ham-rañg vāshud se 'muhib' us baaġh meñ

dil ko ġhair-az-ġhuncha-e-tasvīr kuchh bhātā nahīñ

hai mere pahlu mein aur mujh ko nazar aata nahin

is pari ka sehr yaro kuchh kaha jata nahin

ashk ki barish mein dil se gham nikal aata nahin

ghar se bahar meinh barasne mein koi jata nahin

chaak-e-jeb apne ko main bhi jun gareban-e-sahar

naseha ta-daman-e-mahshar tu silwata nahin

shama san rishte par ulfat ke laga dete hain sar

aashiq aur mashuq sa bhi dusra nata nahin

bas-ki tere hijr mein hai na-gawara akl-o-sharb

dil ba-juz KHun-e-jigar ai jaan kuchh khata nahin

main hi tum sab ka bana tir-e-malamat ka nishan

us but-e-sarkash ko yaro koi samjhata nahin

wae ye ghaflat ki dariya bich qatre ki tarah

aap hi mein aap ko DhunDun hun aur pata nahin

tark-e-ishq us sarw-e-baala ka kiya hai jab se dil

aalam-e-baala se baalai KHabar lata nahin

bas-ki hai ham-rang washud se 'muhib' us bagh mein

dil ko ghair-az-ghuncha-e-taswir kuchh bhata nahin