hai meri zist tere gham se farozan jaanan

hai mirī ziist tire ġham se farozāñ jānāñ

kaun kahtā hai mujhe be-sar-o-sāmāñ jānāñ

terī yādeñ mire hamrāh ba-har-gām haiñ jab

maiñ ne samjhā hī nahīñ ḳhud ko pareshāñ jānāñ

nabz-e-ehsās bahut sust huī jaatī hai

dil ko darkār hai phir dard kā paikāñ jānāñ

hañste hañste nazar aate the jahāñ ġhuncha-o-gul

vīrāñ vīrāñ sā lage hai vo gulistāñ jānāñ

ab na vo soz na vo saaz hai dil meñ phir bhī

ek āvāz sī aatī hai ki jānāñ jānāñ

zikr-e-māzī se gurezāñ huuñ ye sach hai lekin

yaad hai aaj bhī mujh ko tirā paimāñ jānāñ

itnī tanhā.ī kā ehsās musalsal ho agar

apne saa.e se bhī Dar jaatā hai insāñ jānāñ

tere hāthoñ kī vo mehñdī vo tirā surḳh libās

is tasavvur se bhī dil hai mirā larzāñ jānāñ

ek muddat huī go ahd-e-bahārāñ guzre

chaak hai aaj talak merā garebāñ jānāñ

maiñ tujhe bhuul na paayā to ye chāhat hai mirī

yaad rakkhā hai jo tū ne tirā ehsāñ jānāñ

aaj 'ḳhālid' ke ḳhayālāt kī har rāhguzar

hai tire husn ke partav se charāġhāñ jānāñ

hai meri zist tere gham se farozan jaanan

kaun kahta hai mujhe be-sar-o-saman jaanan

teri yaaden mere hamrah ba-har-gam hain jab

main ne samjha hi nahin KHud ko pareshan jaanan

nabz-e-ehsas bahut sust hui jati hai

dil ko darkar hai phir dard ka paikan jaanan

hanste hanste nazar aate the jahan ghuncha-o-gul

viran viran sa lage hai wo gulistan jaanan

ab na wo soz na wo saz hai dil mein phir bhi

ek aawaz si aati hai ki jaanan jaanan

zikr-e-mazi se gurezan hun ye sach hai lekin

yaad hai aaj bhi mujh ko tera paiman jaanan

itni tanhai ka ehsas musalsal ho agar

apne sae se bhi Dar jata hai insan jaanan

tere hathon ki wo mehndi wo tera surKH libas

is tasawwur se bhi dil hai mera larzan jaanan

ek muddat hui go ahd-e-bahaaran guzre

chaak hai aaj talak mera gareban jaanan

main tujhe bhul na paya to ye chahat hai meri

yaad rakkha hai jo tu ne tera ehsan jaanan

aaj 'KHalid' ke KHayalat ki har rahguzar

hai tere husn ke partaw se charaghan jaanan