hai sara lams ka fitna hawas pagal hain

hai saarā lams kā fitna havās pāgal haiñ

ḳhudā kā shukr ki chehra-shanās pāgal haiñ

tumhāre shahr meñ pāgal vo haiñ jo hañste haiñ

hamāre shahr meñ saare udaas pāgal haiñ

vo mujh meñ paanī piyegī nahīñ nahīñ mujh meñ

jhagaḌ rahe haiñ musalsal gilās pāgal haiñ

shu.ūr vaale hī golī chalānā jānte haiñ

maiñ mutma.in huuñ mire ās-pās pāgal haiñ

mujhe samajhne kī manzil hai muntazir un kī

yaqīnī baat hai pāgal kī aas pāgal haiñ

maiñ un se pūchhūñgā jannat haiñ bechte kaise

mujhe navāz agar tere paas pāgal haiñ

vo apnī sadiyoñ ko tishna-dahan banā.e ga.e

bujhā rahe haiñ jo lamhoñ kī pyaas pāgal haiñ

hamārī vaqt se bantī to kis tarah bantī

mizāj-e-vaqt ko aate hī raas pāgal haiñ

tumhāre ba.ad siyānoñ kā haal kyā hogā

tumhāre ba.ad yahāñ par udaas pāgal haiñ

libās vāloñ se baḌh kar hayā hai āñkhoñ meñ

hamārī āñkhoñ meñ kuchh be-libās pāgal haiñ

tujhe satā.eñge jab tak tirī razā hogī

ham har tarah se tabī.at-shanās pāgal haiñ

tumhāre ahd ke sau se haiñ mohtaram 'kāzim'

hamāre ahd meñ jo ki pachās pāgal haiñ

hai sara lams ka fitna hawas pagal hain

KHuda ka shukr ki chehra-shanas pagal hain

tumhaare shahr mein pagal wo hain jo hanste hain

hamare shahr mein sare udas pagal hain

wo mujh mein pani piyegi nahin nahin mujh mein

jhagaD rahe hain musalsal gilas pagal hain

shuur wale hi goli chalana jaante hain

main mutmain hun mere aas-pas pagal hain

mujhe samajhne ki manzil hai muntazir un ki

yaqini baat hai pagal ki aas pagal hain

main un se puchhunga jannat hain bechte kaise

mujhe nawaz agar tere pas pagal hain

wo apni sadiyon ko tishna-dahan banae gae

bujha rahe hain jo lamhon ki pyas pagal hain

hamari waqt se banti to kis tarah banti

mizaj-e-waqt ko aate hi ras pagal hain

tumhaare baad siyanon ka haal kya hoga

tumhaare baad yahan par udas pagal hain

libas walon se baDh kar haya hai aankhon mein

hamari aankhon mein kuchh be-libas pagal hain

tujhe sataenge jab tak teri raza hogi

hum har tarah se tabiat-shanas pagal hain

tumhaare ahd ke sau se hain mohtaram 'kazim'

hamare ahd mein jo ki pachas pagal hain