ہے سنا سا مگر جدا سا لگے

ہے سنا سا مگر جدا سا لگے

نام اس کا ہمیں بھلا سا لگے

اس کو چاہا نہیں ہے سمجھا ہے

یہ ریاض اس کو مشغلہ سا لگے

اس کی تہمت میں ہے محبت بھی

ہو کے پتھر بھی آئنہ سا لگے

اس کے ہونٹوں سے نام بھی اپنا

ایک مجذوب کی صدا سا لگے

ایک پل میں لگے وہ ہے یک جاں

دوسرے پل میں دوسرا سا لگے

کیوں نہ پیار آئے ایسے لہجے پر

جس میں غصہ بھی التجا سا لگے

ہم کو سمجھے بغیر چاہا تھا

اس کی الفت تو حادثہ سا لگے

عشق کے ع سے نہیں واقف

وہ جنہیں عشق بد دعا سا لگے

پھر محبت تو شرک ہے اس سے

آدمی ہو کے جو خدا سا لگے