hai turfa tamasha sar-e-bazar-e-mohabbat

hai turfa tamāsha sar-e-bāzār-e-mohabbat

sar bechte phirte haiñ ḳharīdār-e-mohabbat

allāh kare tū bhī ho bīmār-e-mohabbat

sadqe meñ chhuTeñ tere giraftār-e-mohabbat

is vāste dete haiñ vo har roz nayā daaġh

ik dard ke ḳhūgar na hoñ bīmār-e-mohabbat

kuchh tazkira-e-ishq rahe hazrat-e-nāseh

kānoñ ko maza detī hai guftār-e-mohabbat

vaa.iz kī zabāñ par to vo kalima hai ki goyā

baḳhshe hī na jā.eñge gunahgār-e-mohabbat

dekhā hai zamāne ko in āñkhoñ ne to ai 'dāġh'

is rang par is Dhang par inkār-e-mohabbat

hai turfa tamasha sar-e-bazar-e-mohabbat

sar bechte phirte hain KHaridar-e-mohabbat

allah kare tu bhi ho bimar-e-mohabbat

sadqe mein chhuTen tere giraftar-e-mohabbat

is waste dete hain wo har roz naya dagh

ek dard ke KHugar na hon bimar-e-mohabbat

kuchh tazkira-e-ishq rahe hazrat-e-naseh

kanon ko maza deti hai guftar-e-mohabbat

waiz ki zaban par to wo kalima hai ki goya

baKHshe hi na jaenge gunahgar-e-mohabbat

dekha hai zamane ko in aankhon ne to ai 'dagh'

is rang par is Dhang par inkar-e-mohabbat