hai wasf tera muhit-e-azam

hai vasf tirā muhīt-e-āzam

yaañ taab kise shanāvarī kī

dī zindagī aur us kā sāmāñ

kyā shaan hai banda-parvarī kī

shāhansha-e-vaqt hai vo jis ne

tere dar kī gadāgarī kī

bad-tar huuñ vale karam se tere

ummīd-e-qavī hai behtarī kī

kyā aañkh ko til diyā ki jis meñ

vus.at hai charḳh-e-chambarī kī

dekhā to vahī hai rāh-o-rahrav

phir us ne hai aap rahbarī kī

har shakl meñ thā vahī numūdār

ham ne hī nigāh sarsarī kī

kyā baat hai gar kiyā tarahhum

haihāt jo tū ne dāvarī kī

kī ba.ad-e-ḳhizāñ bahār paidā

sūkhī Tahnī harī-bharī kī

jhuuT aur mubālaġha ne afsos

izzat kho dī suḳhanvarī kī

likkhī thī ġhazal ye āgara meñ

pahlī tārīḳh january kī

hai wasf tera muhit-e-azam

yan tab kise shanawari ki

di zindagi aur us ka saman

kya shan hai banda-parwari ki

shahansha-e-waqt hai wo jis ne

tere dar ki gadagari ki

bad-tar hun wale karam se tere

ummid-e-qawi hai behtari ki

kya aankh ko til diya ki jis mein

wusat hai charKH-e-chambari ki

dekha to wahi hai rah-o-rahraw

phir us ne hai aap rahbari ki

har shakl mein tha wahi numudar

hum ne hi nigah sarsari ki

kya baat hai gar kiya tarahhum

haihat jo tu ne dawari ki

ki baad-e-KHizan bahaar paida

sukhi Tahni hari-bhari ki

jhuT aur mubaalagha ne afsos

izzat kho di suKHanwari ki

likkhi thi ghazal ye aagara mein

pahli tariKH january ki