hai ye gul ki aur uski aab mein farq

hai ye gul kī aur us kī aab meñ farq

jaise paanī meñ aur gulāb meñ farq

lab-e-ḳhūbāñ kahāñ vo la.al kahāñ

hai bahut sharbat aur sharāb meñ farq

laakh gaalī kahī hai kam mat de

maiñ ginūñgā na ho hisāb meñ farq

zāhidā zohd tū paḌhā, maiñ ishq

hai mirī aur tirī kitāb meñ farq

ai sharābī gazak to kartā hai

kuchh to kar dil meñ aur kabāb meñ farq

aañkh jab se khulī na dekhā kuchh

zindagānī meñ aur hubāb meñ farq

kuchh nahīñ karte tum jo sho.ale meñ

aur is rū-e-pur-itāb meñ farq

hai zamīñ āsmān kā yaaro

zarre meñ aur āftāb meñ farq

kyūñki 'jur.at' ho shaiḳh tujh sā ki hai

piirī aur ālam-e-shabāb meñ farq

hai ye gul ki aur us ki aab mein farq

jaise pani mein aur gulab mein farq

lab-e-KHuban kahan wo lal kahan

hai bahut sharbat aur sharab mein farq

lakh gali kahi hai kam mat de

main ginunga na ho hisab mein farq

zahida zohd tu paDha, main ishq

hai meri aur teri kitab mein farq

ai sharabi gazak to karta hai

kuchh to kar dil mein aur kabab mein farq

aankh jab se khuli na dekha kuchh

zindagani mein aur hubab mein farq

kuchh nahin karte tum jo shoale mein

aur is ru-e-pur-itab mein farq

hai zamin aasman ka yaro

zarre mein aur aaftab mein farq

kyunki 'jurat' ho shaiKH tujh sa ki hai

piri aur aalam-e-shabab mein farq