hai zulf-e-shab ki tamanna tere shabab ka rang

hai zulf-e-shab kī tamanna tire shabāb kā rang

jo dekh le to badal jaa.e māhtāb kā rang

tirī nigāh kī ye kaif-bāriyāñ tauba

bharā huā tirī āñkhoñ meñ hai sharāb kā rang

ayaañ huā hai mohabbat kī dāstāñ ban kar

kisī ke chehra-e-pur-nūr par hijāb kā rang

hai un kī chasm-e-tajāhul kī kār-farmā.ī

badal gayā jo mirī ziist kī kitāb kā rang

dil-e-hazīñ pe na pūchho guzar ga.ī kyā kyā

nigāh-e-husn meñ dekhā jo ijtināb kā rang

ye rang-o-bū-e-chaman aarzī haiñ yuuñ 'ahmad'

ki sat.h-e-āb pe jis tarah ik habāb kā rang

hai zulf-e-shab ki tamanna tere shabab ka rang

jo dekh le to badal jae mahtab ka rang

teri nigah ki ye kaif-bariyan tauba

bhara hua teri aankhon mein hai sharab ka rang

ayan hua hai mohabbat ki dastan ban kar

kisi ke chehra-e-pur-nur par hijab ka rang

hai un ki chasm-e-tajahul ki kar-farmai

badal gaya jo meri zist ki kitab ka rang

dil-e-hazin pe na puchho guzar gai kya kya

nigah-e-husn mein dekha jo ijtinab ka rang

ye rang-o-bu-e-chaman aarzi hain yun 'ahmad'

ki sath-e-ab pe jis tarah ek habab ka rang