hain kaise kaise marahil guhar se aage bhi

haiñ kaise kaise marāhil guhar se aage bhī

ġhazal kuchh aur hai kār-e-hunar se aage bhī

ye sho.abde kā tajassus na ḳhatm hogā kabhī

jahān hogā jahān-e-digar se aage bhī

bhare julūs meñ golī se maarā jā.ūñgā

maiñ sochtā huuñ ḳhudā-e-bashar se aage bhī

ye ird-gard ke manzar mire shanāsā haiñ

guzar huā hai isī rahguzar se aage bhī

varā-e-chashm manāzir kī khoj jaarī rakh

nazar baḌhā zarā hadd-e-nazar se aage bhī

ik aur jism hai merī nazar meñ tujh sā hī

ik aur rañg hai rañg-e-sahar se aage bhī

aziyyateñ haiñ moharram ke ba.ad bhī kitnī

safar mazīd haiñ māh-e-safar se aage bhī

parā.ī aañkh kī putlī sahārā kyā detī

vahāñ ik aur bhañvar thā bhañvar se aage bhī

khule haiñ raaz ka.ī mere qatl ke mujh par

paḌhī hai maiñ ne kahānī ḳhabar se aage bhī

hain kaise kaise marahil guhar se aage bhi

ghazal kuchh aur hai kar-e-hunar se aage bhi

ye shoabde ka tajassus na KHatm hoga kabhi

jahan hoga jahan-e-digar se aage bhi

bhare julus mein goli se mara jaunga

main sochta hun KHuda-e-bashar se aage bhi

ye ird-gard ke manzar mere shanasa hain

guzar hua hai isi rahguzar se aage bhi

wara-e-chashm manazir ki khoj jari rakh

nazar baDha zara hadd-e-nazar se aage bhi

ek aur jism hai meri nazar mein tujh sa hi

ek aur rang hai rang-e-sahar se aage bhi

aziyyaten hain moharram ke baad bhi kitni

safar mazid hain mah-e-safar se aage bhi

parai aankh ki putli sahaara kya deti

wahan ek aur bhanwar tha bhanwar se aage bhi

khule hain raaz kai mere qatl ke mujh par

paDhi hai main ne kahani KHabar se aage bhi