hain muddaton se dekhne walon ke muntazir

haiñ muddatoñ se dekhne vāloñ ke muntazir

ehsās-e-be-panāh kī jāgīr aur ham

koshish na kaam aa.egī ye kis ne kah diyā

baiThe biThā.e maan leñ taqdīr aur ham

mumkin kahāñ koī nazar-andāz kar sake

bāham rahe haiñ shahr kī tauqīr aur ham

jā.eñge ek roz samundar kī god meñ

dariyā ke saath ret kī tahrīr aur ham

fursat kahāñ ki aur kahīñ dekhiye 'fahīm'

har saañs apnī ḳhaak kī ta.amīr aur ham

hain muddaton se dekhne walon ke muntazir

ehsas-e-be-panah ki jagir aur hum

koshish na kaam aaegi ye kis ne kah diya

baiThe biThae man len taqdir aur hum

mumkin kahan koi nazar-andaz kar sake

baham rahe hain shahr ki tauqir aur hum

jaenge ek roz samundar ki god mein

dariya ke sath ret ki tahrir aur hum

fursat kahan ki aur kahin dekhiye 'fahim'

har sans apni KHak ki tamir aur hum