hairan hun dil ka haal chhupaun kahan kahan

hairāñ huuñ dil kā haal chhupā.ūñ kahāñ kahāñ

sab jaan ga.e baat banā.ūñ kahāñ kahāñ

ik chiiz zaḳhm-e-dil hai dikhā.ūñ kahāñ kahāñ

ik baat soz-e-dil hai sunā.ūñ kahāñ kahāñ

do chaar hoñ maqām to tīrath bhī kar bane

har jā jo tū rahe to maiñ jā.ūñ kahāñ kahāñ

har shai meñ har bashar meñ nazar aa rahā hai tū

sajde meñ apne sar ko jhukā.ūñ kahāñ kahāñ

sahrā sahī nasīb meñ par kyā merī sa.at

ik musht-e-ḳhāk ḳhaak uḌā.ūñ kahāñ kahāñ

mahfil meñ mai-kade meñ ki bazm-e-raqīb meñ

batlā ki tujh se aañkh churā.ūñ kahāñ kahāñ

ik dasht-e-lā-hisāb meñ khoyā gayā hai dil

'rahbar' ab us ko DhūñDne jā.ūñ kahāñ kahāñ

hairan hun dil ka haal chhupaun kahan kahan

sab jaan gae baat banaun kahan kahan

ek chiz zaKHm-e-dil hai dikhaun kahan kahan

ek baat soz-e-dil hai sunaun kahan kahan

do chaar hon maqam to tirath bhi kar bane

har ja jo tu rahe to main jaun kahan kahan

har shai mein har bashar mein nazar aa raha hai tu

sajde mein apne sar ko jhukaun kahan kahan

sahra sahi nasib mein par kya meri sat

ek musht-e-KHak KHak uDaun kahan kahan

mahfil mein mai-kade mein ki bazm-e-raqib mein

batla ki tujh se aankh churaun kahan kahan

ek dasht-e-la-hisab mein khoya gaya hai dil

'rahbar' ab us ko DhunDne jaun kahan kahan