hairan hun ki ab laun kahan se main zaban aur

hairāñ huuñ ki ab lā.ūñ kahāñ se maiñ zabāñ aur

lab kahte haiñ kuchh aur unheñ hotā hai gumāñ aur

jaa.eñ to kahāñ jaa.eñ mohabbat ke ḳharīdār

arbāb-e-siyāsat ne to kholī hai dukāñ aur

ma.alūm nahīñ hai mire sayyād ko shāyad

ghuTtī hai agar saañs to khultī hai zabāñ aur

ab vāda-e-fardā meñ kashish kuchh nahīñ baaqī

dohrā.ī huī baat guzartī hai girāñ aur

dekhegī jo ik pal meñ mirī aañkh se tujh ko

ho jā.egī duniyā tirī jānib nigarāñ aur

lag jaatī haiñ mohreñ sī laboñ par unheñ mil kar

hotā hai magar dil ke dhaḌakne kā samāñ aur

khultī haiñ nahīñ hashr ke din bhī mirī āñkheñ

shāyad ki muqaddar meñ hai ik ḳhvāb-e-girāñ aur

ham raakh hue us pe magar aañch na aa.ī

jalne kā samāñ aur jalāne kā samāñ aur

go arz-o-talab ek hasīñ shaġhl hai lekin

is khel meñ baḌh jaatā hai andesha-e-jāñ aur

me.arāj-e-takallum hai ḳhamoshī mirī 'bismil'

aatī hī nahīñ koī mujhe tarz-e-fuġhāñ aur

hairan hun ki ab laun kahan se main zaban aur

lab kahte hain kuchh aur unhen hota hai guman aur

jaen to kahan jaen mohabbat ke KHaridar

arbab-e-siyasat ne to kholi hai dukan aur

malum nahin hai mere sayyaad ko shayad

ghuTti hai agar sans to khulti hai zaban aur

ab wada-e-farda mein kashish kuchh nahin baqi

dohrai hui baat guzarti hai giran aur

dekhegi jo ek pal mein meri aankh se tujh ko

ho jaegi duniya teri jaanib nigaran aur

lag jati hain mohren si labon par unhen mil kar

hota hai magar dil ke dhaDakne ka saman aur

khulti hain nahin hashr ke din bhi meri aankhen

shayad ki muqaddar mein hai ek KHwab-e-giran aur

hum rakh hue us pe magar aanch na aai

jalne ka saman aur jalane ka saman aur

go arz-o-talab ek hasin shaghl hai lekin

is khel mein baDh jata hai andesha-e-jaan aur

mearaj-e-takallum hai KHamoshi meri 'bismil'

aati hi nahin koi mujhe tarz-e-fughan aur