hairan hun ki ye kaun sa dastur-e-wafa hai

hairāñ huuñ ki ye kaun sā dastūr-e-vafā hai

tū misl-e-rag-e-jāñ hai to kyuuñ mujh se judā hai

tū ahl-e-nazar hai to nahīñ tujh ko ḳhabar kyuuñ

pahlū meñ tire koī zamāne se khaḌā hai

likkhā hai mirā naam samundar pe havā ne

aur donoñ kī fitrat meñ sukūñ hai na vafā hai

shikva nahīñ mujh ko ki huuñ mahrūm-e-tamannā

ġham hai to faqat itnā ki tū dekh rahā hai

maiñ shahr-o-bayābāñ meñ tujhe DhūñD chukā huuñ

be-dard to kis hujla-e-pinhāñ meñ chhupā hai

uThtī haiñ jo pahlū se mire dard kī lahreñ

betāb samundar koī siine meñ dabā hai

ai ziist ke dozaḳh se guzarte hue lamho

sochā hai kabhī tum ne ki jiinā bhī sazā hai

ham rakhte haiñ dā'vā ki hai qaabū hameñ dil par

tū sāmne aa jaa.e to ye baat judā hai

ḳhush-baḳht to vo hai jise tū apnā samajh le

kahne ke liye yuuñ to hamārā bhī ḳhudā hai

maiñ dozaḳh-e-jāñ meñ bhī rahā mahv-e-tag-o-tāz

yuuñ kahne ko is 'umr kā har lamha nayā hai

har mauj-e-havā tez fazā tā-ba-ufuq tañg

dil zarra-e-sahrā hai bagūloñ meñ ghirā hai

ai dasht-e-tamannā meñ bhaTakte hue aahū

tū kaun hai kis vaqt kī rah dekh rahā hai

kyuuñ jaage hue shahr meñ tanhā hai har ik shaḳhs

ye raushnī kaisī hai ki saaya bhī judā hai

kis dast-e-hinā-basta kā zevar hai vo ḳhanjar

ġham ban ke jo har shaḳhs ke siine meñ gaḌā hai

Thahrā.e use 'arsh' koī kaise jafā-kash

jo mujh se alag rah ke bhī hamrāh chalā hai

hairan hun ki ye kaun sa dastur-e-wafa hai

tu misl-e-rag-e-jaan hai to kyun mujh se juda hai

tu ahl-e-nazar hai to nahin tujh ko KHabar kyun

pahlu mein tere koi zamane se khaDa hai

likkha hai mera nam samundar pe hawa ne

aur donon ki fitrat mein sukun hai na wafa hai

shikwa nahin mujh ko ki hun mahrum-e-tamanna

gham hai to faqat itna ki tu dekh raha hai

main shahr-o-bayaban mein tujhe DhunD chuka hun

be-dard to kis hujla-e-pinhan mein chhupa hai

uThti hain jo pahlu se mere dard ki lahren

betab samundar koi sine mein daba hai

ai zist ke dozaKH se guzarte hue lamho

socha hai kabhi tum ne ki jina bhi saza hai

hum rakhte hain da'wa ki hai qabu hamein dil par

tu samne aa jae to ye baat juda hai

KHush-baKHt to wo hai jise tu apna samajh le

kahne ke liye yun to hamara bhi KHuda hai

main dozaKH-e-jaan mein bhi raha mahw-e-tag-o-taz

yun kahne ko is 'umr ka har lamha naya hai

har mauj-e-hawa tez faza ta-ba-ufuq tang

dil zarra-e-sahra hai bagulon mein ghira hai

ai dasht-e-tamanna mein bhaTakte hue aahu

tu kaun hai kis waqt ki rah dekh raha hai

kyun jage hue shahr mein tanha hai har ek shaKHs

ye raushni kaisi hai ki saya bhi juda hai

kis dast-e-hina-basta ka zewar hai wo KHanjar

gham ban ke jo har shaKHs ke sine mein gaDa hai

Thahrae use 'arsh' koi kaise jafa-kash

jo mujh se alag rah ke bhi hamrah chala hai