hairat hai aah-e-subh ko sari faza sune

hairat hai āh-e-sub.h ko saarī fazā sune

lekin zamīñ pe but na falak par ḳhudā sune

fariyād-e-andalīb se kāñpe tamām baaġh

lekin na gul na ġhuncha na bād-e-sabā sune

ḳhud apnī hī sadāoñ se gūñje hue haiñ kaan

koī kisī kī baat sune bhī to kyā sune

ye bhī ajab tilism hai ai shorish-e-hayāt

dard-āshnā kī baat na dard-āshnā sune

shāhoñ ke dil to sañg haiñ shāhoñ kā zikr kyā

ye bhī nahīñ ki haal gadā kā gadā sune

aalam hai ye ki gosh-e-bashar tak hai be-niyāz

honā thā ye ki banda kahe aur ḳhudā sune

sunte bhī haiñ jo log to yuuñ dāstān-e-ġham

jaise yazīd sāneha-e-karbalā sune

haañ ai ḳhuda-e-arsh-e-barīñ o butān-e-farsh

tum meñ se ho koī to mirā mājrā sune

pashmīna-posh rāh-nashīnoñ kī iltijā

shāyad kabhī vo shāhid-e-atlash-qabā sune

ham nādir o yazīd na hajjāj haiñ na shimr

allāh aur 'josh' hamārī duā sune

hairat hai aah-e-subh ko sari faza sune

lekin zamin pe but na falak par KHuda sune

fariyaad-e-andalib se kanpe tamam bagh

lekin na gul na ghuncha na baad-e-saba sune

KHud apni hi sadaon se gunje hue hain kan

koi kisi ki baat sune bhi to kya sune

ye bhi ajab tilism hai ai shorish-e-hayat

dard-ashna ki baat na dard-ashna sune

shahon ke dil to sang hain shahon ka zikr kya

ye bhi nahin ki haal gada ka gada sune

aalam hai ye ki gosh-e-bashar tak hai be-niyaz

hona tha ye ki banda kahe aur KHuda sune

sunte bhi hain jo log to yun dastan-e-gham

jaise yazid saneha-e-karbala sune

han ai KHuda-e-arsh-e-barin o butan-e-farsh

tum mein se ho koi to mera majra sune

pashmina-posh rah-nashinon ki iltija

shayad kabhi wo shahid-e-atlash-qaba sune

hum nadir o yazid na hajjaj hain na shimr

allah aur 'josh' hamari dua sune