halak-e-justuju tha hirs ka mara na tha pahle

halāk-e-justujū thā hirs kā maarā na thā pahle

dahī dil hai magar itnā bhī āvāra na thā pahle

manāzir bāġh-o-ban ke dil-kushā bhī dil-shikan bhī the

magar fitrat-shikan yuuñ vaqt kā dhārā na thā pahle

jo hotā gulshan-e-ḳhūbī to hotī shān-e-mahbūbī

vahī insāñ hai lekin shāḳh-e-sad-pāra na thā pahle

sukūñ thā sāya-e-tūbā jo mīThī niiñd sote the

ki har ghar ḳhāna-e-askandar-o-dārā na thā pahle

chaman ke saath jalnā hai safīrān-e-chaman ko bhī

tamāzat thī magar phūloñ meñ añgārā na thā pahle

ye duniyā sā.ebāñ DhūñDegī phir agle zamānoñ meñ

ki zer-e-āsmāñ ye qahr-e-nazzārā na thā pahle

maiñ jū-e-nishāt-o-ġham huuñ koh-o-bāġh-o-sahrā meñ

ki maarā hijr kā thā husn kā maarā na thā pahle

sitāra thā koī jis se munavvar thī ye tanhā.ī

nazar meñ zau-fishāñ ye āsmāñ saarā na thā pahle

halak-e-justuju tha hirs ka mara na tha pahle

dahi dil hai magar itna bhi aawara na tha pahle

manazir bagh-o-ban ke dil-kusha bhi dil-shikan bhi the

magar fitrat-shikan yun waqt ka dhaara na tha pahle

jo hota gulshan-e-KHubi to hoti shan-e-mahbubi

wahi insan hai lekin shaKH-e-sad-para na tha pahle

sukun tha saya-e-tuba jo miThi nind sote the

ki har ghar KHana-e-askandar-o-dara na tha pahle

chaman ke sath jalna hai safiran-e-chaman ko bhi

tamazat thi magar phulon mein angara na tha pahle

ye duniya saeban DhunDegi phir agle zamanon mein

ki zer-e-asman ye qahr-e-nazzara na tha pahle

main ju-e-nishat-o-gham hun koh-o-bagh-o-sahra mein

ki mara hijr ka tha husn ka mara na tha pahle

sitara tha koi jis se munawwar thi ye tanhai

nazar mein zau-fishan ye aasman sara na tha pahle