hum aaj khaenge ek tir imtihan ke liye

ham aaj khā.eñge ik tiir imtihāñ ke liye

ki vaqf karnā hai dil nāz-e-jāñ-sitāñ ke liye

jalā ke dil ko lapak se Daro na shole kī

zabāñ darāz hai lekin nahīñ fuġhāñ ke liye

isī chaman meñ ki vus.at hai jis kī nā-mahdūd

nahīñ panāh kī jā ek āshiyāñ ke liye

kiyā thā zabt ne dāva-e-rāzdāri-e-ishq

uThā hai dard kaleje meñ imtihāñ ke liye

kisī ko DhūñDe na miltā nazar kī choT kā niil

na hotā dil meñ suvaidā agar nishāñ ke liye

sivā-e-dil ke jo sarmāya-e-do-ālam hai

na kuchh yahāñ ke liye hai na kuchh vahāñ ke liye

na ishq jurm hai koī na dil kī baat hai raaz

burā ho sharm kā ik qufl hai zabāñ ke liye

ḳhilāf apne rahī vaz-e-sāz-o-barg-e-chaman

qafas bane haiñ jo tinke the āshiyāñ ke liye

laraz rahe haiñ falak 'ārzū' ki āh-e-rasā

chalī hai teġh-ba-kaf fat.h-e-haft-ḳhvāñ ke liye

hum aaj khaenge ek tir imtihan ke liye

ki waqf karna hai dil naz-e-jaan-sitan ke liye

jala ke dil ko lapak se Daro na shole ki

zaban daraaz hai lekin nahin fughan ke liye

isi chaman mein ki wusat hai jis ki na-mahdud

nahin panah ki ja ek aashiyan ke liye

kiya tha zabt ne dawa-e-raazdari-e-ishq

uTha hai dard kaleje mein imtihan ke liye

kisi ko DhunDe na milta nazar ki choT ka nil

na hota dil mein suwaida agar nishan ke liye

siwa-e-dil ke jo sarmaya-e-do-alam hai

na kuchh yahan ke liye hai na kuchh wahan ke liye

na ishq jurm hai koi na dil ki baat hai raaz

bura ho sharm ka ek qufl hai zaban ke liye

KHilaf apne rahi waz-e-saz-o-barg-e-chaman

qafas bane hain jo tinke the aashiyan ke liye

laraz rahe hain falak 'arzu' ki aah-e-rasa

chali hai tegh-ba-kaf fath-e-haft-KHwan ke liye