hum aap ki uljhan mein izafa nahin karte

ham aap kī uljhan meñ izāfa nahīñ karte

jaa.ez bhī shikāyat ho to bejā nahīñ karte

ham ḳhilqat-e-ġhaibī kī banāte haiñ jamā'at

tanhā.ī meñ sajda kabhī tanhā nahīñ karte

kyā un se farāvānī-e-imkān kī ummīd

jo log kisī buuñd ko dariyā nahīñ karte

kyoñ hijr bhalā vasl kī qīmat pe ḳharīdeñ

ham 'ishq meñ nuqsān kā saudā nahīñ karte

duniyā ke fasādāt meñ shāmil rahe 'āsim'

vo log bhī jo ḳhvāhish-e-duniyā nahīñ karte

hum aap ki uljhan mein izafa nahin karte

jaez bhi shikayat ho to beja nahin karte

hum KHilqat-e-ghaibi ki banate hain jama'at

tanhai mein sajda kabhi tanha nahin karte

kya un se farawani-e-imkan ki ummid

jo log kisi bund ko dariya nahin karte

kyon hijr bhala wasl ki qimat pe KHariden

hum 'ishq mein nuqsan ka sauda nahin karte

duniya ke fasadat mein shamil rahe 'asim'

wo log bhi jo KHwahish-e-duniya nahin karte