hum aise log jald asir-e-KHizan hue

ham aise log jald asīr-e-ḳhizāñ hue

lekin ġhurūr-o-tamkanat-e-gulsitāñ hue

tūfān-e-ahd-e-tāza tirā shukriya ki ab

jitne sitāre zehn meñ chamke dhuāñ hue

aa.e haiñ phuul dhuup se bachne mirī taraf

merā hī dil hai chāñd jahāñ mehmāñ hue

jab tum mile to sāmne mai-ḳhāna mil gayā

aur falsafe hayāt ke sab rā.egāñ hue

merī nazar se aaj gurezāñ hai gulsitāñ

merī nazar kī chhāñv meñ ġhunche javāñ hue

ab kuchh nahīñ hai ma.abad-e-getī ḳhatā mu'āf

motī se ashk sarf-e-mah-o-kahkashāñ hue

ab mā-hasal hayāt kā bas ye hai ai 'salām'

cigarette jalā.ī she'r kahe shādmāñ hue

hum aise log jald asir-e-KHizan hue

lekin ghurur-o-tamkanat-e-gulsitan hue

tufan-e-ahd-e-taza tera shukriya ki ab

jitne sitare zehn mein chamke dhuan hue

aae hain phul dhup se bachne meri taraf

mera hi dil hai chand jahan mehman hue

jab tum mile to samne mai-KHana mil gaya

aur falsafe hayat ke sab raegan hue

meri nazar se aaj gurezan hai gulsitan

meri nazar ki chhanw mein ghunche jawan hue

ab kuchh nahin hai mabad-e-geti KHata mu'af

moti se ashk sarf-e-mah-o-kahkashan hue

ab ma-hasal hayat ka bas ye hai ai 'salam'

cigarette jalai she'r kahe shadman hue