hum aksar tirgi mein apne pichhe chhup gae hain

ham aksar tīrgī meñ apne pīchhe chhup ga.e haiñ

magar jab rāstoñ meñ chāñd ubhrā chal paḌe haiñ

zamāna apnī 'uryānī pe ḳhuuñ ro.egā kab tak

hameñ dekho ki apne aap ko oḌhe hue haiñ

mirā bistar kisī fōtpath par jā kar lagā do

mire bachche abhī se mujh se tarka māñgte haiñ

buland āvāz de kar dekh lo koī to hogā

jo galiyāñ so ga.ī haiñ to parinde jāgte haiñ

koī tafsīl ham se pūchhnā ho pūchh liije

ki ham bhī aa.ine ke sāmne barsoñ rahe haiñ

abhī ai dāstāñ-go dāstāñ kahtā chalā jā

abhī ham jāgte haiñ jumbish-e-lab dekhte haiñ

havā apne hī jhoñkoñ kā ta'āqub kar rahī hai

ki uḌte patte phir āñkhoñ se ojhal ho rahe haiñ

hameñ bhī is kahānī kā koī kirdār samjho

ki jis meñ lab pe mohreñ haiñ darīche bolte haiñ

idhar se pāniyoñ kā relā kab kā jā chukā hai

magar bachche daraḳhtoñ se abhī chimTe hue haiñ

mujhe to chalte rahnā hai kisī jānib bhī jā.ūñ

ki 'aḳhtar' mere qadmoñ meñ abhī tak rāste haiñ

hum aksar tirgi mein apne pichhe chhup gae hain

magar jab raston mein chand ubhra chal paDe hain

zamana apni 'uryani pe KHun roega kab tak

hamein dekho ki apne aap ko oDhe hue hain

mera bistar kisi footpath par ja kar laga do

mere bachche abhi se mujh se tarka mangte hain

buland aawaz de kar dekh lo koi to hoga

jo galiyan so gai hain to parinde jagte hain

koi tafsil hum se puchhna ho puchh lije

ki hum bhi aaine ke samne barson rahe hain

abhi ai dastan-go dastan kahta chala ja

abhi hum jagte hain jumbish-e-lab dekhte hain

hawa apne hi jhonkon ka ta'aqub kar rahi hai

ki uDte patte phir aankhon se ojhal ho rahe hain

hamein bhi is kahani ka koi kirdar samjho

ki jis mein lab pe mohren hain dariche bolte hain

idhar se paniyon ka rela kab ka ja chuka hai

magar bachche daraKHton se abhi chimTe hue hain

mujhe to chalte rahna hai kisi jaanib bhi jaun

ki 'aKHtar' mere qadmon mein abhi tak raste hain