hum apna jo qissa sunane lage

ham apnā jo qissa sunāne lage

vo bole ki phir sar phirāne lage

kahā thā uThā parda-e-sharm ko

vo ulTā hamīñ ko uThāne lage

zarā dekhiye un kī sannā.iyāñ

mujhe dekh kar muñh banāne lage

kahā maiñ ne mil yā mujhe maar Daal

vo jhaT āstīneñ chaḌhāne lage

mujhe aate dekhā juuñ hī duur se

qadam-vār jaldī uThāne lage

uThe vo to ik hashr barpā kiyā

jo baiThe to fitna uThāne lage

ġhizā ġham meñ thī merī ḳhūn-e-jigar

ab a.adā kā bhī rashk khāne lage

kamāl-e-ta.ashshuq nahīñ hai hunūz

abhī se vo muñh ko chhupāne lage

ḳhafā ho ke jab be-bulā.e gayā

mujhe dekh kar muskurāne lage

ġhanīmat hai itnā to uTThā hijāb

ki ab ḳhvāb meñ bhī vo aane lage

vo dil ke uḌāne se vāqif na the

hamīñ to ye ghāteñ batāne lage

magar un pe rāz-e-mohabbat khulā

jo 'majrūh' se bach ke jaane lage

hum apna jo qissa sunane lage

wo bole ki phir sar phirane lage

kaha tha uTha parda-e-sharm ko

wo ulTa hamin ko uThane lage

zara dekhiye un ki sannaiyan

mujhe dekh kar munh banane lage

kaha main ne mil ya mujhe mar Dal

wo jhaT aastinen chaDhane lage

mujhe aate dekha jun hi dur se

qadam-war jaldi uThane lage

uThe wo to ek hashr barpa kiya

jo baiThe to fitna uThane lage

ghiza gham mein thi meri KHun-e-jigar

ab aada ka bhi rashk khane lage

kamal-e-tashshuq nahin hai hunuz

abhi se wo munh ko chhupane lage

KHafa ho ke jab be-bulae gaya

mujhe dekh kar muskurane lage

ghanimat hai itna to uTTha hijab

ki ab KHwab mein bhi wo aane lage

wo dil ke uDane se waqif na the

hamin to ye ghaten batane lage

magar un pe raaz-e-mohabbat khula

jo 'majruh' se bach ke jaane lage