hum apne-ap ki pahchan le ke aae hain

ham apne-āp kī pahchān le ke aa.e haiñ

na.e suḳhan na.e imkān le ke aa.e haiñ

havā ne vaar kiyā to javāb pā.egī

ki ham charāġh bhī tūfān le ke aa.e haiñ

charāġh-e-qurb se kar dījiye unheñ raushan

bujhe bujhe se kuchh armān le ke aa.e haiñ

javāb de na sakegā hamārī bātoñ kā

ki aap aa.ina hairān le ke aa.e haiñ

in āñsuoñ kā koī qadr-dān mil jaa.e

ki ham bhī 'mīr' kā dīvān le ke aa.e haiñ

hamāre paas faqat dhuup hai ḳhayāloñ kī

jhulaste ḳhvāboñ kī dukkān le ke aa.e haiñ

ye zaḳhm-e-dil nahīñ ehsān kī nishānī hai

ham us nigāh kā ehsān le ke aa.e haiñ

jo pārsā ho to kyuuñ imtihāñ se Darte ho

ham e'tibār kā mīzān le ke aa.e haiñ

unhīñ pe saare masā.ib kā bojh rakkhā hai

jo tere shahr meñ īmān le ke aa.e haiñ

hum apne-ap ki pahchan le ke aae hain

nae suKHan nae imkan le ke aae hain

hawa ne war kiya to jawab paegi

ki hum charagh bhi tufan le ke aae hain

charagh-e-qurb se kar dijiye unhen raushan

bujhe bujhe se kuchh arman le ke aae hain

jawab de na sakega hamari baaton ka

ki aap aaina hairan le ke aae hain

in aansuon ka koi qadr-dan mil jae

ki hum bhi 'mir' ka diwan le ke aae hain

hamare pas faqat dhup hai KHayalon ki

jhulaste KHwabon ki dukkan le ke aae hain

ye zaKHm-e-dil nahin ehsan ki nishani hai

hum us nigah ka ehsan le ke aae hain

jo parsa ho to kyun imtihan se Darte ho

hum e'tibar ka mizan le ke aae hain

unhin pe sare masaib ka bojh rakkha hai

jo tere shahr mein iman le ke aae hain