hum apne aap se begane thoDi hote hain

ham apne aap se begāne thoḌī hote haiñ

surūr-o-kaif meñ dīvāne thoḌī hote haiñ

tabāh soch-samajh kar nahīñ huā jaatā

jo dil lagāte hai farzāne thoḌī hote haiñ

barāh-e-rāst asar Dālte haiñ sachche bol

kisī dalīl se manvāne thoḌī hote haiñ

jo log aate haiñ milne tire havāle se

na.e to hote haiñ anjāne thoḌī hote haiñ

isī zamīñ ke ġhazāloñ se hote haiñ ābād

diloñ ke dasht parī-ḳhāne thoḌī hote haiñ

hamesha haath meñ rahte haiñ phuul un ke liye

kisī ko bhej ke mañgvāne thoḌī hote haiñ

ḳhayāl-o-ḳhvāb kī rahtī hai garm-bāzārī

dimāġh-o-dil kabhī vīrāne thoḌī hote haiñ

na aa.eñ aap to mahfil meñ kaun aatā hai

jale na sham.a to parvāne thoḌī hote haiñ

kisī ġharīb ko zaḳhmī kare ki qatl kare

nigāh-e-nāz pe jurmāne thoḌī hote haiñ

'shu.ūr' tum ne ḳhudā jaane kyā kiyā hogā

zarā sī baat ke afsāne thoḌī hote haiñ

hum apne aap se begane thoDi hote hain

surur-o-kaif mein diwane thoDi hote hain

tabah soch-samajh kar nahin hua jata

jo dil lagate hai farzane thoDi hote hain

barah-e-rast asar Dalte hain sachche bol

kisi dalil se manwane thoDi hote hain

jo log aate hain milne tere hawale se

nae to hote hain anjaane thoDi hote hain

isi zamin ke ghazalon se hote hain aabaad

dilon ke dasht pari-KHane thoDi hote hain

hamesha hath mein rahte hain phul un ke liye

kisi ko bhej ke mangwane thoDi hote hain

KHayal-o-KHwab ki rahti hai garm-bazari

dimagh-o-dil kabhi virane thoDi hote hain

na aaen aap to mahfil mein kaun aata hai

jale na shama to parwane thoDi hote hain

kisi gharib ko zaKHmi kare ki qatl kare

nigah-e-naz pe jurmane thoDi hote hain

'shuur' tum ne KHuda jaane kya kiya hoga

zara si baat ke afsane thoDi hote hain