ہم اپنے جسم و روح کے اندر ہی لے چلیں

ہم اپنے جسم و روح کے اندر ہی لے چلیں

چل تلخیٔ حیات تجھے گھر ہی لے چلیں

بازار بے ادب میں جو سستے ہیں آج کل

تہذیب عہد نو کے وہ زیور ہی لے چلیں

شہر وفا کی کوئی علامت ضرور ہو

گوہر نہیں ملے ہیں تو پتھر ہی لے چلیں

موسم کا کوئی ٹھیک نہیں کب ہو مہرباں

صحرا کی سمت کوئی سمندر ہی لے چلیں

زخموں کا اندمال تو ممکن نہیں مگر

دامن پہ لکھ کے نام ستم گر ہی لے چلیں

کچھ تو ثبوت چاہئے ارباب شہر کو

آنکھوں میں رکھ کے گاؤں کا منظر ہی لے چلیں

ان کو یقیں تو آئے وفا کا کسی طرح

ان کے حضور شادؔ مرا سر ہی لے چلیں