hum apne zaKHm sabhi ko dikha nahin sakte

ham apne zaḳhm sabhī ko dikhā nahīñ sakte

jo shikva tum se hai sab ko sunā nahīñ sakte

mire ḳhayāl kī gahrā.ī ko zarā samjho

ki sirf lafz to matlab batā nahīñ sakte

malāl ye hai ki saaqī to ban ga.e sāhab

sharāb haath meñ hai aur pilā nahīñ sakte

ajab hai phuul kī fitrat use masal kar tum

mahakte hāthoñ kī ḳhushbū chhupā nahīñ sakte

likhā gayā jo muqaddar meñ harf-e-āḳhir hai

tum apnī marzī se is ko miTā nahīñ sakte

hazāroñ hiile bahāne tarāsh lo phir bhī

tum apne chehre kī ḳhiffat chhupā nahīñ sakte

ab ek ham haiñ ki sadiyāñ guzār deñ 'ādil'

aur ek vo haiñ ki lamha batā nahīñ sakte

hum apne zaKHm sabhi ko dikha nahin sakte

jo shikwa tum se hai sab ko suna nahin sakte

mere KHayal ki gahrai ko zara samjho

ki sirf lafz to matlab bata nahin sakte

malal ye hai ki saqi to ban gae sahab

sharab hath mein hai aur pila nahin sakte

ajab hai phul ki fitrat use masal kar tum

mahakte hathon ki KHushbu chhupa nahin sakte

likha gaya jo muqaddar mein harf-e-aKHir hai

tum apni marzi se is ko miTa nahin sakte

hazaron hile bahane tarash lo phir bhi

tum apne chehre ki KHiffat chhupa nahin sakte

ab ek hum hain ki sadiyan guzar den 'adil'

aur ek wo hain ki lamha bata nahin sakte