hum apne zauq-e-safar ko safar sitara karen

ham apne zauq-e-safar ko safar sitārā kareñ

na koī zā.icha khīñcheñ na istiḳhāra kareñ

usī se lafz bane maañ bhī ek hai jin meñ

to kaise harf kī be-hurmatī gavāra kareñ

usī sharar ko jo ik ahd-e-yās ne baḳhshā

kabhī diyā kabhī jugnū kabhī sitāra kareñ

shu.ūr-e-sher ne vo aañkh khol dī dil meñ

ki ab to ham pas-e-imkān bhī nazāra kareñ

firāq-rut meñ bhī kuchh lazzateñ visāl kī haiñ

ḳhayāl hī meñ tire ḳhāl-o-ḳhad ubhārā kareñ

ilāhī khol de ham par dar-e-madīna-e-ilm

alī alī isī ummīd par pukārā kareñ

asā nahīñ na sahī ham faqīr log magar

hoñ mauj meñ to talātum ko hī kināra kareñ

ḳhudā kā shukr hai sab zar-pasand jāh-talab

hamārī sohbat-e-be-faiz se kinārā kareñ

mile jo vaqt to 'anjum' ba-sūrat-e-dīvān

murattab apnī riyāzat kā goshvāra kareñ

hum apne zauq-e-safar ko safar sitara karen

na koi zaicha khinchen na istiKHara karen

usi se lafz bane man bhi ek hai jin mein

to kaise harf ki be-hurmati gawara karen

usi sharar ko jo ek ahd-e-yas ne baKHsha

kabhi diya kabhi jugnu kabhi sitara karen

shuur-e-sher ne wo aankh khol di dil mein

ki ab to hum pas-e-imkan bhi nazara karen

firaq-rut mein bhi kuchh lazzaten visal ki hain

KHayal hi mein tere KHal-o-KHad ubhaara karen

ilahi khol de hum par dar-e-madina-e-ilm

ali ali isi ummid par pukara karen

asa nahin na sahi hum faqir log magar

hon mauj mein to talatum ko hi kinara karen

KHuda ka shukr hai sab zar-pasand jah-talab

hamari sohbat-e-be-faiz se kinara karen

mile jo waqt to 'anjum' ba-surat-e-diwan

murattab apni riyazat ka goshwara karen