hum apni talKH yaadon ko bhi dafnane nahin jate

ham apnī talḳh yādoñ ko bhī dafnāne nahīñ jaate

ġharaz ab ham kahīñ bhī dil ko bahlāne nahīñ jaate

ta.āruf az-sar-e-nau un se merā kyā qayāmat hai

purāne yaar bhī ab un se pahchāne nahīñ jaate

maiñ huuñ ik lamha-e-maujūd siine se lagā mujh ko

ki maazī meñ dil-e-nādāñ ko uljhāne nahīñ jaate

na kar kuchh ranj ki hālāt ban jaate haiñ aise hī

kisī ke sar pe kuchh ilzām Thahrāne nahīñ jaate

ye merā ġham bhī to apnī mirī taḳhlīq hai varna

kisī ke dil meñ ḳhud uTh kar to vīrāne nahīñ jaate

use le kar mire dil meñ rahe vahm-o-gumāñ barsoñ

jo aa.e the ḳhudā ban kar ḳhudā maane nahīñ jaate

binā māñge bhī mil jaate haiñ ranj-o-ġham zamāne se

samajh lete agar ye ham to pachhtāne nahīñ jaate

hum apni talKH yaadon ko bhi dafnane nahin jate

gharaz ab hum kahin bhi dil ko bahlane nahin jate

taaruf az-sar-e-nau un se mera kya qayamat hai

purane yar bhi ab un se pahchane nahin jate

main hun ek lamha-e-maujud sine se laga mujh ko

ki mazi mein dil-e-nadan ko uljhane nahin jate

na kar kuchh ranj ki haalat ban jate hain aise hi

kisi ke sar pe kuchh ilzam Thahrane nahin jate

ye mera gham bhi to apni meri taKHliq hai warna

kisi ke dil mein KHud uTh kar to virane nahin jate

use le kar mere dil mein rahe wahm-o-guman barson

jo aae the KHuda ban kar KHuda mane nahin jate

bina mange bhi mil jate hain ranj-o-gham zamane se

samajh lete agar ye hum to pachhtane nahin jate