hum aziz is qadar ab ji ka ziyan rakhte hain

ham aziiz is qadar ab jī kā ziyāñ rakhte haiñ

dost bhī rakhte haiñ to dushman-e-jāñ rakhte haiñ

tab.an insān to dil-dāda-e-fasl-e-gul hai

ham ajab log haiñ jo zauq-e-ḳhizāñ rakhte haiñ

āriz-e-gul ho lab-e-yār ho jām-e-mai ho

jism jal uThtā hai ham hoñT jahāñ rakhte haiñ

vāqi.a ye bhī hai haq baat nahīñ kah sakte

ye bhī da.avā hai bajā muñh meñ zabāñ rakhte haiñ

jis jagah dil thā vahāñ hasrat-e-dil baaqī hai

jis jagah zaḳhm thā ab ek nishāñ rakhte haiñ

ham se kar jaatā hai vo shaḳhs fareb āḳhir-kār

jis ke baare meñ bhī ham nek gumāñ rakhte haiñ

'shaukat' uslūb-e-ġhazal hai muta.ayyan tāham

is meñ ham munfarid andāz-e-bayāñ rakhte haiñ

hum aziz is qadar ab ji ka ziyan rakhte hain

dost bhi rakhte hain to dushman-e-jaan rakhte hain

taban insan to dil-dada-e-fasl-e-gul hai

hum ajab log hain jo zauq-e-KHizan rakhte hain

aariz-e-gul ho lab-e-yar ho jam-e-mai ho

jism jal uThta hai hum honT jahan rakhte hain

waqia ye bhi hai haq baat nahin kah sakte

ye bhi dawa hai baja munh mein zaban rakhte hain

jis jagah dil tha wahan hasrat-e-dil baqi hai

jis jagah zaKHm tha ab ek nishan rakhte hain

hum se kar jata hai wo shaKHs fareb aaKHir-kar

jis ke bare mein bhi hum nek guman rakhte hain

'shaukat' uslub-e-ghazal hai mutayyan taham

is mein hum munfarid andaz-e-bayan rakhte hain