hum dil fida karen ki tasadduq-e-jigar karen

ham dil fidā kareñ ki tasadduq-e-jigar kareñ

jo bhī kaheñ huzūr vahī umr bhar kareñ

kuchh ab to aap chāra-e-dard-e-jigar kareñ

mujh par nahīñ to apne karam par nazar kareñ

kuchh baat hai laboñ pe jo mohr-e-sukūt hai

karne ko naale shaam se ham tā-sahar kareñ

tūl-e-shab-e-firāq se ghabrā gayā hai jī

ai kaash aap qissa mirā muḳhtasar kareñ

le chupke chupke kaam kiye jā ġham-e-firāq

duniyā ko ghar kī baat se kyā bā-ḳhabar kareñ

'nādir' yahī hai asal meñ merāj-e-bandagī

yaad un kī un ke ishq se bhī pesh-tar kareñ

hum dil fida karen ki tasadduq-e-jigar karen

jo bhi kahen huzur wahi umr bhar karen

kuchh ab to aap chaara-e-dard-e-jigar karen

mujh par nahin to apne karam par nazar karen

kuchh baat hai labon pe jo mohr-e-sukut hai

karne ko nale sham se hum ta-sahar karen

tul-e-shab-e-firaq se ghabra gaya hai ji

ai kash aap qissa mera muKHtasar karen

le chupke chupke kaam kiye ja gham-e-firaq

duniya ko ghar ki baat se kya ba-KHabar karen

'nadir' yahi hai asal mein meraj-e-bandagi

yaad un ki un ke ishq se bhi pesh-tar karen