hum dil ko liye bar-sar-e-bazar khaDe hain

ham dil ko liye bar-sar-e-bāzār khaḌe haiñ

hairān-e-tamannā-e-ḳharīdār khaḌe haiñ

ġhairoñ se vo ḳhalvat meñ hai mashġhūl-e-zarāfat

ham rashk ke maare pas-e-dīvār khaḌe haiñ

un sharm-zadoñ ko bhī bulā sāmne apne

jo sharm ke maare pas-e-dīvār khaḌe haiñ

az-bahr-e-ḳhudā baam par aa ai but-e-kāfir

kūche meñ tire tālib-e-dīdār khaḌe haiñ

Dhab pā.ūñ to maiñ us se kahūñ hāl-e-dil apnā

is but ko to ghere hue aġhyār khaḌe haiñ

hai us kī savārī kī ḳhabar sair-e-chaman ko

aur ahl-e-tamāshā sar-e-bāzār khaḌe haiñ

juuñ naqsh-e-qadam baiThne kī jā nahīñ miltī

is kūche meñ ham is liye nā-chār khaḌe haiñ

kūcha hai tirā va.ada-gah-e-ḳhalq ki jis meñ

do-chār jo baiThe haiñ to do-chār khaḌe haiñ

ho azm-e-safar tujh ko to ai 'mus.hafī' ab bhī

chalne ke liye qāfile tayyār khaḌe haiñ

hum dil ko liye bar-sar-e-bazar khaDe hain

hairan-e-tamanna-e-KHaridar khaDe hain

ghairon se wo KHalwat mein hai mashghul-e-zarafat

hum rashk ke mare pas-e-diwar khaDe hain

un sharm-zadon ko bhi bula samne apne

jo sharm ke mare pas-e-diwar khaDe hain

az-bahr-e-KHuda baam par aa ai but-e-kafir

kuche mein tere talib-e-didar khaDe hain

Dhab paun to main us se kahun haal-e-dil apna

is but ko to ghere hue aghyar khaDe hain

hai us ki sawari ki KHabar sair-e-chaman ko

aur ahl-e-tamasha sar-e-bazar khaDe hain

jun naqsh-e-qadam baiThne ki ja nahin milti

is kuche mein hum is liye na-chaar khaDe hain

kucha hai tera wada-gah-e-KHalq ki jis mein

do-chaar jo baiThe hain to do-chaar khaDe hain

ho azm-e-safar tujh ko to ai 'mushafi' ab bhi

chalne ke liye qafile tayyar khaDe hain