hum gham-e-zamana se yun nazar milaenge

ham ġham-e-zamāna se yuuñ nazar milā.eñge

mushkileñ paḌeñgī jab aur muskurā.eñge

phir bahār aa.egī phuul muskurā.eñge

phir junūñ ke afsāne ham ko yaad ā.eñge

zāhirī tapāk un kā de gayā hameñ dhokā

ye samajh rahe the ham dil se dil milā.eñge

āsmāñ ke sah paaro tez-gām sayyāro

an-qarīb tum se bhī ham qadam milā.eñge

jāduī ḳhirad hai vo ye junūñ kī manzil hai

tum idhar na aaoge ham udhar na jā.eñge

vo hazār Thukrā.e ham se ruuTh bhī jaa.e

zindagī ko ḳhud baḌh kar ham gale lagā.eñge

aaj to 'jamālī' ko bazm se uThāte haiñ

ek din zarūr us ko aap phir bulā.eñge

hum gham-e-zamana se yun nazar milaenge

mushkilen paDengi jab aur muskuraenge

phir bahaar aaegi phul muskuraenge

phir junun ke afsane hum ko yaad aaenge

zahiri tapak un ka de gaya hamein dhoka

ye samajh rahe the hum dil se dil milaenge

aasman ke sah paro tez-gam sayyaro

an-qarib tum se bhi hum qadam milaenge

jadui KHirad hai wo ye junun ki manzil hai

tum idhar na aaoge hum udhar na jaenge

wo hazar Thukrae hum se ruTh bhi jae

zindagi ko KHud baDh kar hum gale lagaenge

aaj to 'jamali' ko bazm se uThate hain

ek din zarur us ko aap phir bulaenge