hum garche dil o jaan se bezar hue hain

ham garche dil o jaan se bezār hue haiñ

ḳhush haiñ ki tire ġham ke sazā-vār hue haiñ

uTThe haiñ tire dar se agar sūrat-e-dīvār

ruḳhsat bhī to juuñ sāya-e-dīvār hue haiñ

kyā kahiye nazar aatī hai kyuuñ ḳhvāb ye duniyā

kyā jāniye kis ḳhvāb se bedār hue haiñ

āñkhoñ meñ tire jalve liye phirte haiñ ham log

ham log ki rusvā sar-e-bāzār hue haiñ

kuchh dekh ke piite haiñ lahū ahl-e-tamannā

mai-ḳhvār kisī baat pe mai-ḳhvār hue haiñ

zanjīr-e-havādis kī hai jhankār bahar-gām

kyā jurm kiyā thā ki giraftār hue haiñ

iz.hār-e-ġham-e-zīst kareñ kyā ki 'zafar' ham

vo ġham haiñ ki sharminda-e-iz.hār hue haiñ

hum garche dil o jaan se bezar hue hain

KHush hain ki tere gham ke saza-war hue hain

uTThe hain tere dar se agar surat-e-diwar

ruKHsat bhi to jun saya-e-diwar hue hain

kya kahiye nazar aati hai kyun KHwab ye duniya

kya jaaniye kis KHwab se bedar hue hain

aankhon mein tere jalwe liye phirte hain hum log

hum log ki ruswa sar-e-bazar hue hain

kuchh dekh ke pite hain lahu ahl-e-tamanna

mai-KHwar kisi baat pe mai-KHwar hue hain

zanjir-e-hawadis ki hai jhankar bahar-gam

kya jurm kiya tha ki giraftar hue hain

izhaar-e-gham-e-zist karen kya ki 'zafar' hum

wo gham hain ki sharminda-e-izhaar hue hain