hum gharibon par jafa achchhi nahin

ham ġharīboñ par jafā achchhī nahīñ

bekasoñ kī bad-duā achchhī nahīñ

maut aa.e ye duā achchhī nahīñ

hijr meñ bhī maut kyā achchhī nahīñ

dil-lagī meñ bhī to bigḌī hai bahut

baat ye zulf-e-rasā achchhī nahīñ

haath rañgne kā lahū se ho gumāñ

shoḳh itnī bhī hinā achchhī nahīñ

kyuuñ uḌātī ḳhaak aatī hai bahār

chheḌ asīroñ se sabā achchhī nahīñ

kaam maiḳhāne kā ho jā.egā band

chashm-e-sāqī kī hayā achchhī nahīñ

bosa-e-lab se nahīñ chaltā hai kaam

gāliyoñ kī ye sazā achchhī nahīñ

shaiḳh ye kahtā gayā piitā gayā

hai bahut hī bad-maza achchhī nahīñ

dil vo sab ke leñ ye hai achchhī adā

jaan lene kī adā achchhī nahīñ

ġham ġhalat karne ko maiñ kitnī piyūñ

rāt-din ġham kī ghaTā achchhī nahīñ

ek kāfir mujh se ye kahtā gayā

rāt-din yād-e-ḳhudā achchhī nahīñ

mai-kade ko chhoḌ ka.abe jā 'riyāz'

ġhaflat ai mard-e-ḳhudā achchhī nahīñ

hum gharibon par jafa achchhi nahin

bekason ki bad-dua achchhi nahin

maut aae ye dua achchhi nahin

hijr mein bhi maut kya achchhi nahin

dil-lagi mein bhi to bigDi hai bahut

baat ye zulf-e-rasa achchhi nahin

hath rangne ka lahu se ho guman

shoKH itni bhi hina achchhi nahin

kyun uDati KHak aati hai bahaar

chheD asiron se saba achchhi nahin

kaam maiKHane ka ho jaega band

chashm-e-saqi ki haya achchhi nahin

bosa-e-lab se nahin chalta hai kaam

galiyon ki ye saza achchhi nahin

shaiKH ye kahta gaya pita gaya

hai bahut hi bad-maza achchhi nahin

dil wo sab ke len ye hai achchhi ada

jaan lene ki ada achchhi nahin

gham ghalat karne ko main kitni piyun

raat-din gham ki ghaTa achchhi nahin

ek kafir mujh se ye kahta gaya

raat-din yaad-e-KHuda achchhi nahin

mai-kade ko chhoD kabe ja 'riyaz'

ghaflat ai mard-e-KHuda achchhi nahin