hum hain aur unki KHushi hai aaj-kal

ham haiñ aur un kī ḳhushī hai āj-kal

zindagī hī zindagī hai āj-kal

ġham kā har aalam nayā hai in dinoñ

dil kī har duniyā na.ī hai āj-kal

un kā zikr un kī tamannā un kī yaad

vaqt kitnā qīmtī hai āj-kal

chāñd bhī hai sogvār-e-hijr dost

phīkī phīkī chāñdnī hai āj-kal

jal rahī hai dil meñ sham-e-ārzū

ġham-kade meñ raushnī hai āj-kal

tū hai aur dariyā-dilī hai sāqiyā

maiñ huuñ aur tishna-labī hai āj-kal

be-qarārī karvaToñ par karvaTeñ

dil kā aalam dīdanī hai āj-kal

arz-e-ġham par muskurāte bhī nahīñ

barhamī sī barhamī hai āj-kal

hāsil-e-tark-e-mohabbat dekhnā

anjuman suunī paḌī hai āj-kal

dil meñ aur māyūsiyoñ meñ ai 'shakīl'

ittihād-e-bāhamī hai āj-kal

hum hain aur un ki KHushi hai aaj-kal

zindagi hi zindagi hai aaj-kal

gham ka har aalam naya hai in dinon

dil ki har duniya nai hai aaj-kal

un ka zikr un ki tamanna un ki yaad

waqt kitna qimti hai aaj-kal

chand bhi hai sogwar-e-hijr dost

phiki phiki chandni hai aaj-kal

jal rahi hai dil mein sham-e-arzu

gham-kade mein raushni hai aaj-kal

tu hai aur dariya-dili hai saqiya

main hun aur tishna-labi hai aaj-kal

be-qarari karwaTon par karwaTen

dil ka aalam didani hai aaj-kal

arz-e-gham par muskuraate bhi nahin

barhami si barhami hai aaj-kal

hasil-e-tark-e-mohabbat dekhna

anjuman suni paDi hai aaj-kal

dil mein aur mayusiyon mein ai 'shakil'

ittihad-e-bahami hai aaj-kal