hum hi mein thi na koi baat yaad na tumko aa sake

ham hī meñ thī na koī baat yaad na tum ko aa sake

tum ne hameñ bhulā diyā ham na tumheñ bhulā sake

tum hī na sun sake agar qissa-e-ġham sunegā kaun

kis kī zabāñ khulegī phir ham na agar sunā sake

hosh meñ aa chuke the ham josh meñ aa chuke the ham

bazm kā rañg dekh kar sar na magar uThā sake

raunaq-e-bazm ban ga.e lab pe hikāyateñ rahīñ

dil meñ shikāyateñ rahīñ lab na magar hilā sake

shauq-e-visāl hai yahāñ lab pe savāl hai yahāñ

kis kī majāl hai yahāñ ham se nazar milā sake

aisā ho koī nāma-bar baat pe kaan dhar sake

sun ke yaqīn kar sake jā ke unheñ sunā sake

ijz se aur baḌh ga.ī barhamī-e-mizāj-e-dost

ab vo kare ilāj-e-dost jis kī samajh meñ aa sake

ahl-e-zabāñ to haiñ bahut koī nahīñ hai ahl-e-dil

kaun tirī tarah 'hafīz' dard ke giit gā sake

hum hi mein thi na koi baat yaad na tum ko aa sake

tum ne hamein bhula diya hum na tumhein bhula sake

tum hi na sun sake agar qissa-e-gham sunega kaun

kis ki zaban khulegi phir hum na agar suna sake

hosh mein aa chuke the hum josh mein aa chuke the hum

bazm ka rang dekh kar sar na magar uTha sake

raunaq-e-bazm ban gae lab pe hikayaten rahin

dil mein shikayaten rahin lab na magar hila sake

shauq-e-visal hai yahan lab pe sawal hai yahan

kis ki majal hai yahan hum se nazar mila sake

aisa ho koi nama-bar baat pe kan dhar sake

sun ke yaqin kar sake ja ke unhen suna sake

ijz se aur baDh gai barhami-e-mizaj-e-dost

ab wo kare ilaj-e-dost jis ki samajh mein aa sake

ahl-e-zaban to hain bahut koi nahin hai ahl-e-dil

kaun teri tarah 'hafiz' dard ke git ga sake