hum ishq ke safar mein sarabon mein kho gae

ham 'ishq ke safar meñ sarāboñ meñ kho ga.e

rāh-e-junūñ pe chal ke ḳharāboñ meñ kho ga.e

kuchh phuul saj ga.e haiñ mohabbat kī sej par

murjhā ke chand phuul kitāboñ meñ kho ga.e

pyāsī hai gar zamīn to pyāsā hai āsmāñ

bārish ke qatre tishna sahāboñ meñ kho ga.e

shīrīñ laboñ se jaane vo kyā boltā rahā

ham nīm-vā laboñ ke gulāboñ meñ kho ga.e

paimāne bhar ke jab diye saaqī ne be-hijāb

murshid murīd piir sharāboñ meñ kho ga.e

detā rahā javāb vo har ik savāl kā

saare savāl us ke javāboñ meñ kho ga.e

maañ kī du'ā.eñ āfatoñ ko Tāltī rahīñ

maañ se bichhaḌ ke saḳht 'azāboñ meñ kho ga.e

din bhar ḳhayāl-e-yār meñ tum gum rahe 'sahāb'

Dhalte hī raat yaar ke ḳhvāboñ meñ kho ga.e

hum 'ishq ke safar mein sarabon mein kho gae

rah-e-junun pe chal ke KHarabon mein kho gae

kuchh phul saj gae hain mohabbat ki sej par

murjha ke chand phul kitabon mein kho gae

pyasi hai gar zamin to pyasa hai aasman

barish ke qatre tishna sahabon mein kho gae

shirin labon se jaane wo kya bolta raha

hum nim-wa labon ke gulabon mein kho gae

paimane bhar ke jab diye saqi ne be-hijab

murshid murid pir sharabon mein kho gae

deta raha jawab wo har ek sawal ka

sare sawal us ke jawabon mein kho gae

man ki du'aen aafaton ko Talti rahin

man se bichhaD ke saKHt 'azabon mein kho gae

din bhar KHayal-e-yar mein tum gum rahe 'sahab'

Dhalte hi raat yar ke KHwabon mein kho gae