ham-jins agar mile na koi aasman par

ham-jins agar mile na koī āsmān par

behtar hai ḳhaak Dāliye aisī uḌaan par

aa kar girā thā koī parinda lahū meñ tar

tasvīr apnī chhoḌ gayā hai chaTān par

pūchho samundaroñ se kabhī ḳhaak kā pata

dekho havā kā naqsh kabhī bādbān par

yaaro maiñ is nazar kī bulandī ko kyā karūñ

saaya bhī apnā dekhtā huuñ āsmān par

kitne hī zaḳhm haiñ mire ik zaḳhm meñ chhupe

kitne hī tiir aane lage ik nishān par

jal-thal huī tamām zamīñ ās-pās kī

paanī kī buuñd bhī na girī sā.ebān par

malbūs ḳhush-numā haiñ magar jism khokhle

chhilke saje hoñ jaise phaloñ kī dukān par

saaya nahīñ thā niiñd kā āñkhoñ meñ duur tak

bikhre the raushnī ke nagīñ āsmān par

haq baat aa ke ruk sī ga.ī thī kabhī 'shakeb'

chhāle paḌe hue haiñ abhī tak zabān par

ham-jins agar mile na koi aasman par

behtar hai KHak Daliye aisi uDan par

aa kar gira tha koi parinda lahu mein tar

taswir apni chhoD gaya hai chaTan par

puchho samundaron se kabhi KHak ka pata

dekho hawa ka naqsh kabhi baadban par

yaro main is nazar ki bulandi ko kya karun

saya bhi apna dekhta hun aasman par

kitne hi zaKHm hain mere ek zaKHm mein chhupe

kitne hi tir aane lage ek nishan par

jal-thal hui tamam zamin aas-pas ki

pani ki bund bhi na giri saeban par

malbus KHush-numa hain magar jism khokhle

chhilke saje hon jaise phalon ki dukan par

saya nahin tha nind ka aankhon mein dur tak

bikhre the raushni ke nagin aasman par

haq baat aa ke ruk si gai thi kabhi 'shakeb'

chhaale paDe hue hain abhi tak zaban par