hum jo is shahr mein anjaan hue jate hain

ham jo is shahr meñ anjān hue jaate haiñ

saare rishte bhī to be-jān hue jaate haiñ

ab hameñ chāhiye ki tark-e-ta'alluq kar leñ

ek duuje se pareshān hue jaate haiñ

vo sar-e-bazm hameñ aap se kartā hai ḳhitāb

aur ham is pe pashemān hue jaate haiñ

pech-dar-pech huī jaatī hai duniyā ham par

jaane kyoñ us pe ham āsān hue jaate haiñ

kaun guzrā hai abhī dahr se jis ke ġham meñ

saare manzar hī bayābān hue jaate haiñ

rang laa.ī hai kuchh is tarh se ye tishna-labī

ham ab ik dasht kā 'unvān hue jaate haiñ

hum jo is shahr mein anjaan hue jate hain

sare rishte bhi to be-jaan hue jate hain

ab hamein chahiye ki tark-e-ta'alluq kar len

ek duje se pareshan hue jate hain

wo sar-e-bazm hamein aap se karta hai KHitab

aur hum is pe pasheman hue jate hain

pech-dar-pech hui jati hai duniya hum par

jaane kyon us pe hum aasan hue jate hain

kaun guzra hai abhi dahr se jis ke gham mein

sare manzar hi bayaban hue jate hain

rang lai hai kuchh is tarh se ye tishna-labi

hum ab ek dasht ka 'unwan hue jate hain