hum kabhi ishq ko wahshat nahin banne dete

ham kabhī ishq ko vahshat nahīñ banñe dete

dil kī tahzīb ko tohmat nahīñ banñe dete

lab hī lab hai to kabhī aur kabhī chashm hī chashm

naqsh tere tirī sūrat nahīñ banñe dete

ye sitāre jo chamakte haiñ pas-e-abr-e-siyāh

tere ġham ko mirī aadat nahīñ banñe dete

un kī jannat bhī koī dasht-e-balā hī hogī

zinda rahne ko jo lazzat nahīñ banñe dete

dost jo dard baTāte haiñ vo nādānī meñ

dar-haqīqat mirī sīrat nahīñ banñe dete

fikr fan ke liye lāzim magar achchhe shā.er

apne fan ko kabhī hikmat nahīñ banñe dete

vo mohabbat kā ta.alluq ho ki nafrat kā 'nadīm'

rābte ziist ko ḳhalvat nahīñ banñe dete

hum kabhi ishq ko wahshat nahin banne dete

dil ki tahzib ko tohmat nahin banne dete

lab hi lab hai to kabhi aur kabhi chashm hi chashm

naqsh tere teri surat nahin banne dete

ye sitare jo chamakte hain pas-e-abr-e-siyah

tere gham ko meri aadat nahin banne dete

un ki jannat bhi koi dasht-e-bala hi hogi

zinda rahne ko jo lazzat nahin banne dete

dost jo dard baTate hain wo nadani mein

dar-haqiqat meri sirat nahin banne dete

fikr fan ke liye lazim magar achchhe shaer

apne fan ko kabhi hikmat nahin banne dete

wo mohabbat ka talluq ho ki nafrat ka 'nadim'

rabte zist ko KHalwat nahin banne dete