hum kabhi shahr-e-mohabbat jo basane lag jaen

ham kabhī shahr-e-mohabbat jo basāne lag jaa.eñ

kabhī tūfān kabhī zalzale aane lag jaa.eñ

kabhī ik lamha-e-fursat jo mayassar aa jaa.e

merī socheñ mujhe suulī pe chaḌhāne lag jaa.eñ

raat kā rañg kabhī aur bhī gahrā ho jaa.e

kabhī āsār sahar ke nazar aane lag jaa.eñ

intizār us kā na itnā bhī ziyāda karnā

kyā ḳhabar barf pighalne meñ zamāne lag jaa.eñ

aañkh uThā kar bhī na dekheñ tujhe din meñ ham log

shab ko kāġhaz pe tirā chehra banāne lag jaa.eñ

ham bhī kyā ahl-e-qalam haiñ ki bayāz dil par

ḳhud hī ik naam likheñ ḳhud hī miTāne lag jaa.eñ

ajab insān haiñ ham bhī ki ḳhatoñ ko un ke

ḳhud hī mahfūz kareñ ḳhud hī jalāne lag jaa.eñ

vo hameñ bhūlnā chāheñ to bhulā deñ pal meñ

ham unheñ bhūlnā chāheñ to zamāne lag jaa.eñ

in makānoñ pe ḳhudā apnā karam farmā.e

jin meñ ḳhud un ke makīñ naqb lagāne lag jaa.eñ

nahīñ jaltā to utartā nahīñ qarz-e-zulmat

jalnā chāhūñ to mujhe log bujhāne lag jaa.eñ

ghar meñ baiThūñ to añdhere mujhe nocheñ 'bedil'

bāhar aa.uuñ to ujāle mujhe khāne lag jaa.eñ

hum kabhi shahr-e-mohabbat jo basane lag jaen

kabhi tufan kabhi zalzale aane lag jaen

kabhi ek lamha-e-fursat jo mayassar aa jae

meri sochen mujhe suli pe chaDhane lag jaen

raat ka rang kabhi aur bhi gahra ho jae

kabhi aasar sahar ke nazar aane lag jaen

intizar us ka na itna bhi ziyaada karna

kya KHabar barf pighalne mein zamane lag jaen

aankh uTha kar bhi na dekhen tujhe din mein hum log

shab ko kaghaz pe tera chehra banane lag jaen

hum bhi kya ahl-e-qalam hain ki bayaz dil par

KHud hi ek nam likhen KHud hi miTane lag jaen

ajab insan hain hum bhi ki KHaton ko un ke

KHud hi mahfuz karen KHud hi jalane lag jaen

wo hamein bhulna chahen to bhula den pal mein

hum unhen bhulna chahen to zamane lag jaen

in makanon pe KHuda apna karam farmae

jin mein KHud un ke makin naqb lagane lag jaen

nahin jalta to utarta nahin qarz-e-zulmat

jalna chahun to mujhe log bujhane lag jaen

ghar mein baiThun to andhere mujhe nochen 'bedil'

bahar aaun to ujale mujhe khane lag jaen