hum KHud bhi hue nadim jab harf-e-dua nikla

ham ḳhud bhī hue nādim jab harf-e-duā niklā

samjhe the jise patthar vo shaḳhs ḳhudā niklā

is dasht se ho kar bhī ik sail-e-anā niklā

kuchh barg-e-shajar TuuTe kuchh zor-e-havā niklā

uljhan kā sulajh jaanā ik ḳhām-ḳhayālī thī

jab ġhaur kiyā ham ne ik pech nayā niklā

ai fitrat-e-sad ma.anī 'ġhālib' kī ġhazal hai tū

jab husn tirā parkhā pahle se savā niklā

ham paas bhī jaane se jis shaḳhs ke Darte the

chhū kar jo use dekhā miTTī kā banā niklā

phūloñ meñ 'hilāl' aao ab raqs-e-ḳhizāñ dekheñ

kāñToñ ke nagar meñ to har baaġh harā niklā

hum KHud bhi hue nadim jab harf-e-dua nikla

samjhe the jise patthar wo shaKHs KHuda nikla

is dasht se ho kar bhi ek sail-e-ana nikla

kuchh barg-e-shajar TuTe kuchh zor-e-hawa nikla

uljhan ka sulajh jaana ek KHam-KHayali thi

jab ghaur kiya hum ne ek pech naya nikla

ai fitrat-e-sad mani 'ghaalib' ki ghazal hai tu

jab husn tera parkha pahle se sawa nikla

hum pas bhi jaane se jis shaKHs ke Darte the

chhu kar jo use dekha miTTi ka bana nikla

phulon mein 'hilal' aao ab raqs-e-KHizan dekhen

kanTon ke nagar mein to har bagh hara nikla