hum ko bara-e-duniya be-jaan kar diya hai

ham ko barā-e-duniyā be-jān kar diyā hai

kyā ishq tū ne jiinā āsān kar diyā hai

phir ham ne rāste kā koī usuul toḌā

phir vaqt ne hamārā chālān kar diyā hai

siina phulā ke aise masjid se aa rahe haiñ

allāh-miyāñ pe jaise ehsān kar diyā hai

miTTī ko apnī miTTī paanī ko apnā paanī

sarmāya āb-o-gil kā sab daan kar diyā hai

tū ne hamāre faanī hone kī laaj rakh lī

āb-e-hayāt miTTī meñ saan kar diyā hai

sāhil kī bastiyoñ kā saarā ghamanD TuuTā

sailāb ne tamāñcha jab taan kar diyā hai

sūkhe laboñ pe us ne Tapkāyā āb-e-bosa

aur vo bhī apne hoñThoñ se chhān kar diyā hai

tum soch meñ paḌe ho to sochte raho tum

ham ne to ishq apnā elaan kar diyā hai

ham ne to zaḳhm apne likh likh ke rakh liye the

yāroñ ne jam.a kar ke dīvān kar diyā hai

ham chāhte the apnā karnā use to us ne

ham ko hī apne ghar kā darbān kar diyā hai

duniyā ne kuchh na chhoḌā juz ek 'farhat-ehsās'

har ek farhat-ullāh ko ḳhaan kar diyā hai

hum ko bara-e-duniya be-jaan kar diya hai

kya ishq tu ne jina aasan kar diya hai

phir hum ne raste ka koi usul toDa

phir waqt ne hamara chaalan kar diya hai

sina phula ke aise masjid se aa rahe hain

allah-miyan pe jaise ehsan kar diya hai

miTTi ko apni miTTi pani ko apna pani

sarmaya aab-o-gil ka sab dan kar diya hai

tu ne hamare fani hone ki laj rakh li

aab-e-hayat miTTi mein san kar diya hai

sahil ki bastiyon ka sara ghamanD TuTa

sailab ne tamancha jab tan kar diya hai

sukhe labon pe us ne Tapkaya aab-e-bosa

aur wo bhi apne honThon se chhan kar diya hai

tum soch mein paDe ho to sochte raho tum

hum ne to ishq apna elan kar diya hai

hum ne to zaKHm apne likh likh ke rakh liye the

yaron ne jama kar ke diwan kar diya hai

hum chahte the apna karna use to us ne

hum ko hi apne ghar ka darban kar diya hai

duniya ne kuchh na chhoDa juz ek 'farhat-ehsas'

har ek farhat-ullah ko KHan kar diya hai