hum ko hua tha ishq jawani mein muKHtasar

ham ko huā thā 'ishq javānī meñ muḳhtasar

kirdār thā hamārā kahānī meñ muḳhtasar

mat pūchh raat kitnī aziyyat-guzār thī

milnā thā us se shām-suhānī meñ muḳhtasar

tafsīlī guftugū kā thā mauzū' par vo shaḳhs

jo kah gayā hai baat ravānī meñ muḳhtasar

sūraj-mukhī kā phuul thā nārāz shaam tak

maiñ kho gayā thā raat kī raanī meñ muḳhtasar

bahrūp dostoñ kā 'ayāñ ham pe ho gayā

dekhā nishāna ham ne nishānī meñ muḳhtasar

ā'māl-e-nek-o-bad kī hameñ kyā ḳhabar miyāñ

ham rah rahe haiñ kūcha-e-fānī meñ muḳhtasar

ahvāl likh ke aap hameñ bhej dījiye

'ārif-nazīr' misra'-e-sānī meñ muḳhtasar

hum ko hua tha 'ishq jawani mein muKHtasar

kirdar tha hamara kahani mein muKHtasar

mat puchh raat kitni aziyyat-guzar thi

milna tha us se sham-suhani mein muKHtasar

tafsili guftugu ka tha mauzu' par wo shaKHs

jo kah gaya hai baat rawani mein muKHtasar

suraj-mukhi ka phul tha naraaz sham tak

main kho gaya tha raat ki rani mein muKHtasar

bahrup doston ka 'ayan hum pe ho gaya

dekha nishana hum ne nishani mein muKHtasar

aa'mal-e-nek-o-bad ki hamein kya KHabar miyan

hum rah rahe hain kucha-e-fani mein muKHtasar

ahwal likh ke aap hamein bhej dijiye

'arif-nazir' misra'-e-sani mein muKHtasar