hum ko junun kya sikhlate ho hum the pareshan tum se ziyaada

ham ko junūñ kyā sikhlāte ho ham the pareshāñ tum se ziyāda

chaak kiye haiñ ham ne azīzo chaar garebāñ tum se ziyāda

chāk-e-jigar mohtāj-e-rafū hai aaj to dāman sarf-e-lahū hai

ik mausam thā ham ko rahā hai shauq-e-bahārāñ tum se ziyāda

ahd-e-vafā yāroñ se nibhā.eñ nāz-e-harīfāñ hañs ke uThā.eñ

jab hameñ armāñ tum se sivā thā ab haiñ pashemāñ tum se ziyāda

ham bhī hamesha qatl hue aur tum ne bhī dekhā duur se lekin

ye na samajhnā ham ko huā hai jaan kā nuqsāñ tum se ziyāda

jaao tum apne baam kī ḳhātir saarī laveñ sham.oñ kī katar lo

zaḳhm ke mehr-o-māh salāmat jashn-e-charāġhāñ tum se ziyāda

dekh ke uljhan zulf-e-dotā kī kaise ulajh paḌte haiñ havā se

ham se sīkho ham ko hai yaaro fikr-e-nigārāñ tum se ziyāda

zanjīr o dīvār hī dekhī tum ne to 'majrūh' magar ham

kūcha kūcha dekh rahe haiñ ālam-e-zindāñ tum se ziyāda

hum ko junun kya sikhlate ho hum the pareshan tum se ziyaada

chaak kiye hain hum ne azizo chaar gareban tum se ziyaada

chaak-e-jigar mohtaj-e-rafu hai aaj to daman sarf-e-lahu hai

ek mausam tha hum ko raha hai shauq-e-bahaaran tum se ziyaada

ahd-e-wafa yaron se nibhaen naz-e-harifan hans ke uThaen

jab hamein arman tum se siwa tha ab hain pasheman tum se ziyaada

hum bhi hamesha qatl hue aur tum ne bhi dekha dur se lekin

ye na samajhna hum ko hua hai jaan ka nuqsan tum se ziyaada

jao tum apne baam ki KHatir sari lawen shamon ki katar lo

zaKHm ke mehr-o-mah salamat jashn-e-charaghan tum se ziyaada

dekh ke uljhan zulf-e-dota ki kaise ulajh paDte hain hawa se

hum se sikho hum ko hai yaro fikr-e-nigaran tum se ziyaada

zanjir o diwar hi dekhi tum ne to 'majruh' magar hum

kucha kucha dekh rahe hain aalam-e-zindan tum se ziyaada